Segun Tico Vos

Mester hasi mas pa konmemorá mortonan Julianabrug

128
Vos: ta usa e seremonia aki komo plataformá pa pone tópikonan di importansha riba agènda di polítiko i gobernantenan
Brug Juliana– Ayera a tuma lugá e konmemorashon ofisial anual na e estatua na subida di Brug Koningin Juliana bayendo direkshon di Otrabanda i Skalo. E parti ofisial a konsistí di orashon, un minüt di silensio, ponementu di krans siguí pa diskursonan di esnan invitá pa hasi esaki. Periodista komunikado Tico Vos den su relatonan prensa a hiba krítika riba e konmemorashon di ayera.

Vos ta lamentá ku tur e papiamentunan i enfokenan tresé dilanti bes tras bes i tur e promesanan hasí  ta bai den bientu i  bientu ta kue nan bai ku nan sin ku NUNKA nada konkreto ta bin afó. Loke ta mas lamentabel segun Vos, ta ku ta usa e seremonia aki komo plataformá pa pone tópikonan di importansha riba agènda di polítiko i gobernantenan pero masha poko lus ta ser tirá na e motibu primordial di e paramentu ketu aki esta para ketu na e víktimanan i esnan ku a pèrdé nan bida durante konstrukshon di e brùg klave aki pa komunikashon entre e dos bandanan di nos bahia di Santa Ana.

Por lo muy ménos bo ta sperá un seremonia ku kada aña tin su karakter inovativo i “out of the box” ku ta yuda nos para ketu na e impaktó grandi ku e tragedia aki a trese den bida di e 16 trahadónan aki.  E spichnan no ta yuda nos komprondé kada bes mas mihó e embargadura di e suseso, tragedia NASHONAL aki.  Lo bo spera ku ta menshoná e  nòmbernan di e personanan, trahadónan ku a fayesé i a bira víktima na momento di e derumbe di e brùg aki  ku tabata den konstrukshon. Komo ku ta hasi menshon di dos fecha 6 di febrüari  1967 i 7 di yanüari 1972 bo ta asumí ku ta tin apénas algun aña despues dje aksidente di 1967 atrobe na mes un brùg aki otro aksidente fatal ku morto komo konsekuensha. Riba e plakat di koper ta bisto ku a Purba rank’é bai ku n’e i e ta sushá  ku fèrf i e plakat ku ta poné na nòmber di Gobièrnu di Kòrsou ta kontené un kantidat di eror gramatikal. Ta falta aksènt , ta skirbi e konsonante i eróneamente i ta faya ku reglanan di asentuashon i ta papia di omenahe kaminda segun buki di oro e palabra mester ta homenage. I e plakat ta Papia di víktimanan di desgrasianan.. faltando na apuntá ku morto komo konsekuensha. Kua instansha ta enkargá ku mantenshon i korekshon di erornan ortográfiko riba e plakatnan ku ta kompa˜ã e monumentonan riba nos isla i ta hasi sigur ku henter aña e vegetashon i plantashon  rondó di e monumentonan aki ta den bon kondishon?, Vos ta puntrando.