Tin un kambio grandi ta bai tuma lugá den ámbito di Tambú

52
Pronto e ta bai papia e bèrdat.

WILLEMSTAD,—-Tin un kambio hopi grandi ta bai tuma lugá den ámbito di Tambú. Di in formashon ku a drenta serka di ‘E Mulina’, ta bisa ku promé ku 2018 yega na su final un kantante hopi popular ta bai kambia di grupo di Tambú.

Ta trata aki di un kantante ku ya tin algun aña ta skor hopi haltu den género di Tambú. ‘E Mulina’, tin informashon ku e kambio aki lo bai bira dos den 1, for di nos fuente nos a komprendé ku e kambio aki lo bai paralisá ámbito di Tambú sigur pa algun dia.

Paso ningun hende no ta bai kere ku e kambio aki ta bai tuma lugá. Esaki ta nifiká ku tin un grupo di Tambú ta bai pèrdè un di nan ardu mayó. Òf den otro palabra un pilar di e grupo en kuestion. Nos tin asta informashon ku si e kantante en kuestion bandoná e grupo ku e ta forma parti di dje te na e momentu aki, e grupo lo bai basha den otro.

Mester bisa ku kabesante di e grupo lo bai haña sorpresa di su bida, na momentu ku e kantante entrega su karta di retiro. Esaki no ta bai duru muchu, nos tin informashon ku e kambio por bai tuma lugá e luna aki mes, òf mas tarda den luna di desèmber. ‘E Mulina’, ta na altura ku negoshashon a tuma lugá i ta un detaye chikí so falta pa tuma lugá pa e kambio bira konosí. Esaki ta nifiká ku bo mester sigui bo Korant Vigilante tur e dia nan aki, paso un ora pa otro nos ta drenta ku e kambio di aña 2018.