80 dominikano a regresá bèk nan pais despues di kumpli ku kastigunan di prizòn

1688
Algun di esnan ku a regresá bèk na pais.

SANTO DOMINGO – E gobièrnu di Estádos Unídos a manda bèk un grupo di 80 dominikano ku a kaba di kumpli ku diferente kastigunan di prizòn na Estádos Unídos pa entre otro narkotráfiko, homisidio i otro delitunan.

Segun a keda indiká, esnan ku a keda mandá bèk pa nan pais, a keda mandá den un avion estadounidense.

E dominikanonan a keda trasladá pa e pais, kontrolá pa outoridatnan den e avion. Ta trata aki di agentenan di e Servisio di Inmigrashon i Kontrol di Duana.

E grupo di personanan aki a kaba di kumpli diferente kastigunan di prizòn na Estádos Unídos, akusá di delitunan relashoná ku droga, krímen, froude, atrako, falsifikashon di dokumentonan i hopi mas.

Esaki nan a keda risibí pa trahadónan di Direkshon General di Migrashon, miembronan di Kuerpo Spesialisá den Seguridat di Aeropuerto i di Aviashon Sivil di e pais.

Despues di nan yegada, nan a keda trasladá den dos diferente busnan pa e sede di Direkshon di Migrashon, unda nan lo keda tratá i kontrolá pa posibel asuntunan pendiente ku hustisia di nan propio pais.

Segun outoridatnan a indiká, na e aeropuerto di Las Americas, un total di 1612 dominikano a keda mandá di Estádos Unídos e aña aki bèk.