Hòmber sentensiá na 20 aña di prizòn pa insesto kontra yu muhé

97
E hòmber a keda kondená na 20 aña di prizòn komo kastigu pa su aktonan.

SANTO DOMINGO – Un hòmber a keda kondená na un total di 20 aña di prizòn. Ta trata aki di un hòmber ku a keda akusá di kometé insesto kontra su yu muhé menor di edat, den un echo registrá na Los Rios.

E akusado, kende su nòmber no a keda publiká pa asina intentá di protehá identidat di e víktima, a keda mandá pa e sentro di detenshon nashonal di La Victoria, unda e lo kumpli e sentensia diktá pa e Promé Tribunal Kolegiado di e Distrito Nashonal. Esaki formá pa e wesnan Gisselle Mendez, Yissel Naranjo i Tania Yunes.

E Ministerio Públiko, representá pa e prokurador fiskal Merline Tejera, a indiká den tratamentu di e kaso ku e agresor durante kuater aña, for di na momentu ku e víktima tabatin dies aña, tabata kometé e aktonan di violashon seksual kontra di dje.

A señalá ademas ku e hòmber tabata probechá ku su kasá i mama di e víktima tabata biaha pa eksterior pa di e forma aki bai traha, pa e kometé e delitunan seksual kontra di su víktima menor di edat.

E fiskal investigador di e kaso, identifiká komo Juana Cabrera, a manifestá ku e akshonnan deliktivo di e akusado a keda deskubrí na momentu ku e hobensita a kuminsá presentá problemanan di komportashon na e skol unda e ta asistí. Tabata na momentu ku el a keda evaluá, ku un sikólogo a revelá kiko a sosodé. Esaki na luna di febrüari tras di lomba.

Debí na esaki, e direktor di e sentro edukativo a informá e Departamento di outoridatnan, kua mesora a inisiá ku un investigashon di e echo.

E informe di evaluashonnan sikológiko realisá na e víktima,a revelá ku tabata kousa di e aktonan teribel kometé kontra su persona, ku esaki a kuminsá sufri i mustra troumanan emoshonal.