Kòrsou ku triunfo ayera na Tampa

229
Miemnbronan di selekshon futbol U-20 di Korsou.
TAMPA—E selekshon nashonal di futbòl, kategoria U-20, ku ta dirigí pa Luty Alberto, a logra triunfo ayera. Un ke otro na Tampa den e kompetensia di Concacaf, pa futbolistanan bou di 20 aña di edat. Esaki ta un torneo di Concacaf, ku alabes ta klasifikatorio pa mundial U-20, ku lo hunga na Polonia.

Nos selekshon nashonal ya ta eliminá, unda ayera nan a logra nan promé triunfo i puntonan, despues di realisá 3 enkuentro, den e grupo ku nan ta kompetiendo. Den e promé wega, nos muchanan, ku ta repartí den 10 ku ta hunga den futbòl lokal i otro 10 komo refuerso for di Hulanda, a kai vensí 2-1 den pitu kontra El Salvador, djabièrnè último.

Seguidamente nos a pèrdè ku skor di 3-1, na man di Guatemala, den partido ku a mira akshon djadumingu tras di lomba.

Ayera e ekipo U-20 lokal a enfrentá e selekshon similar for di Guyana i a logra triunfo pèrtá, ku skor di 4-3. Esaki despues di tabata den bentaha di 3-2 na sosiegu.

Jaron Vicario, Meghon Valpoort i Carolith Fermina, huntu ku un outogol, tabata esnan ku a sòru pa e 4 golnan di Kòrsou.

Nos ekipo nashonal, ayera a inisiá wega, hungando ku kiper Kevin Juliana, huntu ku tambe Quinton Burk, Ayodele Kwidama, Meghon Valpoort, Jaron Vicario, Quincy Does, Sharrion Pietersz, Rogyaer Anita, Gianni Vandepitte, Nixon Buntin i Carolith Fermina.

Miéntras tantu mañan, djasabra dia 10 novèmber 2018, Kòrsou lo hunga su último wega di e kompetensia, na momentu ku nos muchanan sali kontra di e ekipo di Cayman Island.