Ministerio Públiko a bolbe pidi 10 mion i 240 ora di trabou pa Emsley Tromp

...Den korte di apelashon...

310
Den apelashon ministerio públiko a bolbe pidi mesun kastigu ku den korte di promé instansia pa e direktor di Banko Sentral
Willemstad,– Ayera korte di apelashon a trata e kaso di Ministerio Públiko kontra di señor Emsley Tromp èks direktor di Banko Sentral. E kaso konosí komo Saffier ta kaminda ku ta akusá señor Tromp di a yena su papelnan di Inkomstenbelasting di 2006 pa 2014 konsientemente robes pa asina skapa di impuesto.

Abogado general di ministerio Públiko Kòrsou a hasi un demanda ayera atrobe di 240 ora di trabou boluntario kontra señor Emsley Tromp. Un demanda ku e lo mester kumpli kuné den un aña di tempu despues di e veredikto i tambe e demanda ku e tin ku paga bèk dos biaha loke el a paga ménos na impuesto durante e añanan ku a keda investigá i ku lo suma un total di 10 mion florin. Pues prokurador General a pidi 240 ora di trabou i 10 mion florin di but.

Den korte di promé instansia, a pidi e mesun kastigunan aki pa señor Tromp, pero el a keda a deklará liber di tur akusashon i tabata akinan ku OM a disidí ku ta bai apelá e kaso i kual a tuma lugá ayera.

Práktikamente OM a bini ku e mesun akusashonnan dilanti  kaminda ta akusá e eks direktor di Banko Sentral di a  perhudiká nos pais ku 5.5 mion florin, unda segun OM el a hasi esaki intenshonal. PG ta bisa ku esaki a tuma lugá durante mas ku 5 aña, miéntras tambe a el a bisa ku e malversashon di impuesto a tuma lugá entre aña 2007 i aña 2015. Den e kaso aki fiskal van der Werf i de Vries a representá Ministerio Públiko ku rekisitorio basta largu i aki dos siman korte lo duna veredikto den e kaso aki.

Emsley Tromp: Mi no tin bida ni entrada mas

Willemstad,– Loke a hala atenshon den korte ayera sin duda ta e echo ku e direktor di Banko Sentral señora Emsley Tromp a bisa hues ku for di despues ku e problemanan a surgi, e no tin bida i e no tin niun entrada mas.

Señor Tromp a splika hues ku unda ku e bai, nan ta ning’é debí na e problemanan ku el a bin konfrontá kuné.

Tabata despues ku e presidente di Banko Sentral a tuma algun dia liber debí na e investigashon ku tin andando den su kontra ku el a kaba di yega Kòrsou for di eksterior i ku e la wòrdu aserka pa algun funshonario di RST.

E dia ei a splika Tromp e motibu di nan presensia. A bai kuné den un kamber na Hato unda a pone na altura di nan presensia i a hiba un kombersashon kòrtiku kuné pa despues  a konfiská e telefon personal di Emsley Tromp i a lag’é bai den kompania di su seguridatnan. Segun e èks direktor di Banko Sentral for di e dia ei

Hues a tuma mas di mei ora pa hasi pregunta na PG

Willemstad,– Algu no usual i ku sierto abogadonan a bisa ku nunka den nan karera nan a mira, ta e echo ku durante tratamentu di e kaso saffier ayera den korte de apelashon,  un di e tres huesnan a tuma mas di mei ora pa keda bati un di e dos fiskalnan ku bòshi pregunta. (Sigur mas ku 25), buskando sierto aklarashonnan. Vigilante a papia ku un abogado kende a splika ku nunka el a mira esaki,   pero ku e ta kere ku esaki ta debi na e echo ku e kaso saffier kaminda ta akusá señor Emsley Tromp di a yena papelnan di inkomsten belasting robes konsientemente, ta un kaso ku hopi detaye den e parti tekniko. Hasta dado momentu a parse ku e hues a tuma e ròl di abogado. Aki dos siman ora tin veredikto lo sa e motibu di tantu pregunta di parti di e hues.