Sugar by Design 2018 16, 17 i 18 di novèmber den PWFC

181
WILLEMSTAD – Sugar by Design 2018 ta un evento dushi den tur sentido; e ambiente lo ta dushi den èrko i tambe tur loke keda eksponé tin suku aden, ounke ku lo tin tambe produktonan p’esnan ku no ta usa suku, trahá ku suku natural òf sin suku. Caribbean Bakery & Restaurant Supplies tabata sitio unda ku e konferensha di prensa a tuma lugá, durante kua a duna tur informashon rondó di e evento úniko aki.

Promé piso
Sra. Margie Rodriguez, kordinadó di e evento, a splika ku e evento lo tuma lugá den henter e edifisio di PWFC na Schottegatweg i a duna splikashon di kiko tur lo tin riba e promé piso. Riba e piso aki lo tin entre otro varios stènt bou di dak i tambe den sala, unda públiko lo por atmirá, purba i mas ku klaro kumpra e diferente produktonan. Banda di esei, lo tin tambe varios idea pa dekorashon di fiesta, diferente model di bolo, produktonan salú, regalonan pa duna na fiesta i fin di aña i mas ku klaro benta di bolo i nos kosnan dushi. Den e sala mes lo krea un ‘patio’ kaminda ku bo lo por sinta i disfrutá di e ambiente.

Un novedat ku e evento aki tin, ta ku bo mes por harma bo buki di reseta pa traha bolo i kosnan dushi;  abo ta skohe e reseta ku bo ke i e momentu ei ta harma bo buki, kuminsando na fl. 10,-.

Di dos piso
E di dos piso tambe lo ta kargá. Sra. Richenna Mathilda, miembro di organisashon di Sugar by Design, a konta mas aleu ku ariba tambe lo tin mas stènt, bonkuné, sekshon kaminda nos muchanan por dòrna bolo i tambe e area di demostrashon i e diferente kursonan.

Demostrashon i kurso
Sugar by Design ta konta ku presensia di Dalila Cabrita, un instruktor internashonal kende a keda aserká pa kompartí su konosementu ku nos hendenan. E kursonan ta kosta fl. 275,- i tin durashon di  4 ora. Esaki ta inkluí tur material, bo mes ta traha bo piesa kompleto i naturalmente bo ta bai kas kuné. Mester remarká ku e téknikanan ku lo duna ta nobo pa Kòrsou!Tambe lo tin diferente demostrashonnan ku durashon di 1 ora pa fl. 30,- kada un.

Representante di Caribbean Bakery & Restaurant Supplies, sra. Ana da Silva, a ekspresá su satisfakshon di ta un di e partnernan di e evento aki, den kua natural nan tambe lo eksponé tur nan produktonan ku nan tin i speshalmente pa e temporada di fin di aña i na preisnan speshal.

Entrada i orario
Sugar by Design 2018 ta tuma lugá riba djabièrnè 16 di novèmber di 6or di atardi pa 10or di anochi, djasabra 17 di novèmber di 3or di atardi pa 10or di anochi i riba djadumingu 18 di novèmber di 10or di mainta pa 8or di anochi. Pa esnan ku ta den ròlstul òf tin kualke desabilidat, lo no ta problema pa bai riba e di dos piso ya komo ku tin lef den e edifisio.  Entrada ta kosta únikamente fl. 5,-.  Mucha te ku 5 aña ta GRATIS.