“Fin di un asuntu ta mihó ku su inisio”

197
'Acha' huntu ku 'Vader'.
WILLEMSTAD—“Fin di un asuntu ta mihó ku su inisio. Kara na laria i kurason kontentu. Tur fanátiko di Centro Dominguitu por keda trankil. ‘Acha’ no ta bai niun kaminda. Na FFK e tin kontrakt di 2 aña ku a kaba di alargá. Kier men nos no tin nada pa firma i ningun formulario pa yena.

‘Un tata por tin 20 yu, pero e no ta lubidá niun su nòmber’. Tur kos ta bai outomátikamente, paso ta di kas e ta. E pic aki ta saká djasabra último, den oranan di anochi, na Miles Jazz Cafe.

Nos a hiba un bon kombersashon ku Vesta si. E organisashonnan ta sigui mantené e bon laso ku otro. Mi ta spera ku esakinan por ta palabra kla i lo kita tur duda”, tabata deklarashon di Roderick ‘Vader’ Volk, presidente di e ekipo di Centro Dominguitu.

Un ke otro durante di un kombersashon ku Deporte Vigilante ayera den oranan di dia, relashoná ku e futuro di e futbolista Ashar ‘Acha’ Bernardus.

Tur esaki despues ku siman pasá Bernardus a firma algu ku Vesta, unda Deporte Vigilante a kompartí ku bo komo fiel lektor, pero miéntras tantu a kambia di desishon i tòg lo keda kas, komo parti di ‘E Famia’.

Tabata djabièrnè último ku dirigente di e dos ekiponan a reuní, ku e  futbolista aki, komo tópiko. Miéntras tantu e futbolista a keda pa e mes tambe kòmbersá ku Centro Dominguitu, riba su deseo, pa e kambio.

Pero finalmente e desishon final, ta konosí.