Jafar Arias ku gol pa seya triunfo di FC Emmen

165
Jafar Arias !
HULANDA—E atakante miembro di nos selekshon nashonal i di e ekipo di FC Emmen, den divishon máksimo di futbòl na Hulanda, Jafar Arias, a anotá pa su ekipo djasabra último. Esaki faltando 2 minüt pa e pitaso final, den wega ku e la hunga kompletu kontra NAC di Breda, unda nan a gana 2-0.

Su gol tabata pa seya e triunfo, riba e ekipo di otro miembro di nos selekshon, kende ta Jurich Carolina, ku a inisiá i a hunga 74 minüt den kousa pèrdí.

Banda di esakinan, tambe tabatin diferente otro miembro di nos selekshon nashonal, ku nan ekipo a mira akshon durante di e fin di siman ku ta tras di lomba.

Selekshonadónan ku no a hunga

Entre esakinan tabatin, kende lo yega Kòrsou mañan, kende no a mira akshon. Un ke otro, unda ku si nan tabata na banki.

Entre otro tabatin nos kiper Eloy Room, ku PSV, den wega di Eredivisie na Hulanda, ora ku nan a gana De Graafschap 4-1.

Kapitan i miembro di nos liña defensivo ‘Cuco’ Martina, tambe tabata komo suplente pa Stoke City, den wega ku nan a empatá sin gol kontra Nottingham Forest, bálido pa Championship ingles.

Esnan ku si a hunga

Miéntras ku Jarchinio Antonia a inisiá i hunga te minüt 67, pa Omonia Nicosia na Chipre, ora ku nan a gana Doxa Katokopia 2-1.

Brandley Kuwas a hunga kompletu pa Heracles, den wega di Eredivisie na Hulanda, ora ku nan a pèrdè 2-0 kontra Feyenoord, ku tabatin Tyrell Malacia i Lutsharel Geertruida na banki komo suplente.

Elson ‘Sontje’ Hooi a inisiá i a wòrdu remplasá na minüt 78 di wega, unda ku Giovanni Troupee si a hunga kompletu pa ADO Den Haag na tera friu. Esaki den wega ku nan a pèrdè ku skor mínimo kontra AZ di Alkmaar, ku Ricardo van Rhijn hungando e último 11 minütnan pa e ekipo ganadó.

Leandro Bacuna a hunga durante di hinter e 90 minütnan di wega pa Reading den Championship di futbòl na Inglatera, ora ku nan a empatá na 2 gol kontra Ipswich Town. Esaki despues di tabata atras na sosiegu i tabata Leandro Bacuna, kende tabatin e asistensia pa e gol di empate.

Demas futbolistanan di nos

Entre demas futbolistanan oriundo di nos isla, kende no ta parti di nos ekipo nashonal, Juninho Bacuna tabata na banki pa Huddersfield Town i no a hunga den wega ku nan a empatá na 1 kontra West Ham United den Premier League.

Patrck van Aanholt a hunga kompletu den Premier League pa su ekipo Crystal Palace, den wega ku nan a pèrdè 1-0 kontra Tottenham Hotspur.

Leroy Fer tambe a bai wega kompletu. Esaki den Championship ingles, hungando pa Swansea City, ku a gana di Bolton Wanderers 1-0, unda inkluso e la risibí un karchi hel.

Joshua Brenet a inisiá na banki i a drenta pa hunga den e último 2 minütnan den Bundesliga na Alemania. Tabata den wega ku su ekipo Hoffenheim, a gana di Augsburg 2-1.

Jetro Willems tabata komo suplente i no a hunga den wega unda Eintracht Franfurt a gana di Schalke 04, 3-0 den Bundesliga na Alemania.

Sherel Floranus a hunga 90 minüt pa Heerenveen, ora nan a gana FC Groningen 2-0 ayera den divishon máksimo di futbòl na Hulanda.

Justin Kluivert a inisiá i keda remplasá faltando 9 minüt pa e pitaso final den Serie na Italia, pa AS Roma. Tabata den wega ku nan a gana di Sampdoria 4-1.