Nelson Tremus ta gradisí su amistatnan pa nan kontribushon

170
Ambiente serka Nelson Tremus.
WILLEMSTAD—Ya ta un tradishon ku Nelson Tremus ta organisá un reunion ku su grupo di amistatnan, pa asin’aki den su forma úniko i spesial gradisí esakinan pa nan sosten brindá hinter aña na su proyektonan.

Tabata djadumingu último ku e multi talentoso Nelson Tremus, hòmber grandi pa loke ta diferente aktividat i proyekto pa hóbennan i prinsipalmente den e deporte di biar den e bario di Boka Samí i Kòrsou en general, a organisá un reunion pa tur su hendenan ku di un òf otro forma a i ta kolaborá kuné i su proyektonan tantu promé i durante e aña aki.

Tur ku a akudí por a disfrutá di algu di kome i bebe i un ambiente dushi unda e propio Nelson Tremus a entretené su invitadonan ku músika bibu toká pa su propio persona.

Nelson a gradisí tur presente i a komentá ku un di su deseonan ta pa amplia e edifisio di biar (Boca Stars Pool) ku aktualmente ta konta ku 3 mesa di biar, pa di e forma aki e por amplia esaki ku 5 mesa di biar pa asina organisá eventonan internashonal.

Nelson a gradisí prensa en general tambe ku a yuda ku publikashon di diferente aktividat i prinsipalmente e aktuashon di su ñetu Shamir Tremus den eksterior ku e chèri riba e bolo ku ta su aktuashon den e kampionato mundial hubenil di biar na Rusia.