2 wega bálido pa kategoria superior di vòlibòl awe

120
Akshon den wega femenino klase A.

 

WILLEMSTAD—Kancha di e sala deportivo Errol Rooi na Sentro Deportivo Kòrsou na Brievengat, awe lo ta esenario pa dos diferente wega di vòlibòl, bálido pa e kampionato 2018/2019, ku ta dediká na un baluarte di e deporte, kende ta Dito Ravenstein.

Ta trata aki di partidonan bálido pa e kategoria superior, unda unu lo bai ta den e divishon maskulino i otro den femenino. Esakinan lo hunga simultaniamente, inisiando 8’or di anochi.

Den femenino e ekiponan di Hurricane i Stakamahachi lo ta enfrentando otro, miéntras ku e wega den maskulino, lo bai entre e ekiponan di Xaverianen i Stakamahachi.

Un ke otro despues ku djaluna último tambe tabatin 4 wega ku a mira akshon, den sala di deporte na SDK. E weganan aki  tabata bálido pa kategoria klase A i a finalisá ku e siguiente resultadonan:

Den femenino tabata Hurricane ku ta gana di Watakeli ku skor pèrtá di 2-1. Miéntras ku den weganan maskulino tabata Xaverianen ku ta gana e promé set riba Stakamahachi, ku seguidamente ta reakshoná i gana 2 set sigui pa bai ku e triunfo.

E ekipo di Warwarú seguidamente a gana di Green Tigers 2-0 i Watakeli tambe ta gana di Titus 2-0.