Diferente mucha di nos huntu ku ‘Jong Oranje’

232
Tahith Chong.
HULANDA—Diferente mucha oriundo di nos isla Kòrsou, ta parti di e selekshon Jong Oranje, ku lo mira akshon djabièrnè próksimo. Esaki den un wega di fogeo, ku lo tuma lugá na Offenbach Alemania, den stadion Sparda Bank Hessen.

E defensornan Sheral Floranus di Heerenveen, Tyrell Malacia di Feyenoord i Armando Obispo di PSV, tur na Hulanda, huntu ku e atakantenan Justin Kluivert di AS Roma na Italia i Tahith Chong di Manchester United na Inglatera, tambe ta parti di e ekipo ku e keda konvoká pa e ekipo hulandes pa e kompromiso aki. Un ke otro unda ku tantu Tahith Chong, komo Armando Obispo, lo ta pa promé biaha ku e ekipo i ta kla pa nan debut, ku e ekipo dirigí pa tékniko Erwin van de Looi.

 

Lokual ku sigur a hala atenshon, tabata e manera ku Chong a introdusí su mes, na esnan ku ainda no konosé su persona.

“Mi ta hunga na Inglatera ku Manchester United. Mi no sa unda otro lo por konosé mi, pero tirando un bista riba Internèt, por mira algu. MI ta un atakante ku ta hunga na liña i sigur ta gusta pa laga esun ku ta defendé mi tras di mi lomba.

Te ainda ta bai bon i sigur mi ta gusta pa ta parti di e trainingnan di e promé ekipo, ku sigur ta tremendo eksperensia i sigur un soño for di mas chikí. Bo ta hunga huntu ku hungadónan di nòmber manera Paul Pogba i Anthony Martial, i ta siña hopi di nan.

Ta dependé di mes prestashon kon lihé mi lo logra pa e debut. Mi no por bisa kaba kon serka mi ta, pero for ora di ta train ku nan mi ta den serkania”, e futbolista Tahith Chong a deklará.