‘Acha’ i Geryon a anotá pa Centro Dominguitu gana Undeba

162
Akshon di wega Victory Boys vs Inter/Willemstad.
WILLEMSTAD—E kampionato di futbòl FFK den promé divishon a sigui durante di fin di siman tras di lomba ku 2 wega. Ámbos a mira akshon djasabra den Stadion Antoine Maduro na Kintjan.

Centro Dominguitu vs Undeba

Den promé wega di anochi, rèfri Arthur Gosepa a dirigí, unda Centro Dominguitu a gana di Undeba 2-1. Esaki despues ku e enkuentro a sosegá ku e ekiponan empatá na 1 gol.

Ashar Bernardus for di un tiru liber a duna Dominguitu bentaha, pa seguidamente Lendell Johannes ku un tremendo kabesaso, sòru pa e empate pa Undeba, unda Demy Rosario a debutá komo tékniko.

Den e parti komplementario, Geryon Alberto, a sòru pa e gol viktorioso pa e muchanan di Dominguitu. Pues tékniko Henry Caldera i Vesta a sòru pa Bernardus i Alberto ta den bon kondishon, pa asina nan anotá mesora i yuda nan ekipo logra triunfo riba Undeba. Un ke otro despues ku ámbos tabata praktikando ku Vesta, pero a opta pa keda kas.

Victory Boys vs Inter/Willemstad

Miéntras ku den e di dos wega di anochi, tabata rèfri Juniel ‘Araña’ Adelina, kende a dirigí e wega ku a bai entre di Victory Boys i Inter/Willemstad. Despues di un lucha tenas, ámbos ekipo a regresá kas ku 1 punto, despues di un empate sin gol.

E kampionato den promé divishon ta sigui djarason awó pa 8’or di anochi na Kintjan, ora Jong Colombia enfrentá Scherpenheuvel.