Kòrsou tabata bon representá den Taekwondo na Aruba

127
Atletanan ku a logra premio den taekwondo na Aruba.
WILLEMSTAD—E skol di Taekwondo Olympia Taekwondo Association i e selekshon senior di Kòrsou, pa loke ta e deporte di Taekwondo, resientemente a partisipá na un kompetensia internashonal di Taekwondo.

Esaki a tuma lugá durante di e fin di siman tras di lomba, djasabra último, na Aruba. Na e kompetensia aki titulá “Best of the Best  Powerade Taekwondo Cup 2018”, a partisipá atletanan for di Kòrsou, Venezuela, Aruba, Chile, Colombia, Merka, Canada, Repúblika Dominikana, Ecuador i Sürnam.

Na e kompetensia aki ta e atletanan ku a wòrdu selektá so, por a kompetí. Tabata un kompetensia di hopi nivel.

Den e biahe deportivo ku éksito aki, e skol di Taekwondo Olympia Taekwando Association, a partisipá ku 5 hóben atleta, miéntras ku e selekshon senior lokal, a representá nos isla, ku 4 atleta. E atletanan aki a sa di hasi un hopi bon trabou, representando nos isla dignamente. Tur e atletanan a kompetí den 2 pul i tambe tin di nan ku a haña ‘personal challenge’.

Pa loke ta e representantenan di e ekipo hubenil lokal, Harish Roojer a sa di  premio di ‘Best Fighter’. Miéntras ku Quishon Donker a logra Plata, meskos ku tabata e kaso ku Thyxainely Paredes.

Thaveon Donker a optené un medaya di Oro i tambe 1 di Plata. Harish Roojer a logra 3 Oro, Harif Roojer 1 oro i Rahim Antonio 2 Oro.

Nos atletanan di selekshon ku a optené premio na Aruba, tabata Dylano Streedel, kende a regresá kas ku 2 Oro i tambe 1 Plata, Shadeon Donker 1 Oro i 1 Plata, Reniel Roch 1 Oro i 1 Plata i Theodore Heyliger a optené un medaya di Plata.

OTA i selekshon senior lokal, kier a gradisí speshalmente nan entrenadó, kende ta Gilson Lourens, pa e bon trabou ku e ta hasiendo. Miéntras ku Olympia Taekwondo Assocation por mira atras riba un aña 2018, ku tabata unu eksitoso.