Sòftbòl a sera aña ku eksitoso klínika

90
Esnan ku a partisipá na e klinika.
WILLEMSTAD—Tabata ayera, djadumingu dia 18 novèmber 2018, ku federashon di sòftbòl di Kòrsou, tabatin nan último aktividat di aña. Esaki a tuma lugá den e sala deportivo, Errol Rooi na Sentro Deportivo Kòrsou na Brievengat.

Tabata un tremendo klínika di bateo i tambe picheo. E picheo tabata dirigí pa Patrik Girigorie, kende ta un ‘pichingcoach’ sertifiká i asistí pa Leonella Elizabeth.

Pa e parti di bateo tabata Isonette Polonius, kende a guia esaki, ku asistensia di entre otro Nataly Lourens, Almarisca Hooi, Suvianka Virginia i Marvin ‘Ping’ Wijman.

Tabata sigur un klínika di un nivel, ku pa hopi aña sòftbòl riba nos isla, no a eksperensiá. Despues di e klínika tur sòftbolista ku a partisipá a risibí nan sertifikado di partisipashon.

Di e manera aki direktiva di federashon di sòftbòl di Kòrsou ta yama danki na tur e boluntarionan ku a yuda pa e dia aki a bira un éksito i tambe ta bai palabranan di gradisimentu speshalmente na Banko Maduro, ku ta e spònser prinsipal di C.S.B., ku nan sosten unda por a realisá e klínika aki.