Justin Kluivert den Tòp 5 pa ‘Golden Boy Award’

163
Justin Kluivert den Tòp 5 pa Golden Boy Award 2018.
WILLEMSTAD—E hóben futbolista, Justin Kluivert, kende ta yu di e konosido eks futbolista i tambe eks tékniko di e selekshon nashonal di Kòrsou, Patrick Kluivert, ta den e tòp 5 di futbolistanan bou di 21 aña di edat, kende ta esnan konsiderá komo esnan mas talentoso di aña.

Ta trata aki di e premio, ku ta wòrdu opsekiá pa e korant deportivo di Italia, Tuttosport.

Despues ku a inisiá ku un lista di 100 talentoso futbolista, tabata ayera ku a bolbe adaptá esaki i awor e ta di solamente 5 hungadó. Entre esakinan tin e atakante di AS Roma den Serie A di futbòl na Italia, kende anteriormente a hunga den Eredivisie na Hulanda ku Ajax, Justin Kluivert.

Kluivert Jr. ta entre e promé 5 nan, huntu ku tambe e miembro di e ekipo di Ajax, Matthijs De Ligt, Patrick Cutrone (AC Milan), Trent Alexander-Arnold (Liverpool) i tambe Vinicius Junior (Real Madrid).

E premio aki a wòrdu ganá aña pasá pa Kylian Mbappe.

Miéntras tantu na desèmber benidero, periodistanan di futbòl, lo yega na e desishon, pa loke ta e ganadó di e premio aki, bálido pa aña 2018.