Segundo seri weganan promé divishon FFK tambe na Kintjan

118
Direktiva di FFK i baluartenan na kende kampionato ta dediká.
WILLEMSTAD—Kontrali na lokual ku tabata e intenshon, unda weganan bálido pa e segundo seri di e promé buèlta den promé divishon di futbòl FFK, mester a hunga na Brievengat, awó lo hunga na Kintjan.

Esaki despues ku manera FFK a duna di konosé, ku ta pa motibunan fuera di nan alkanse.

Tabata e intenshon pa partidonan ku lo mira akshon, entrante djabièrnè benidero, hunga den Stadion Ergilio Hato na Brievengat. Sinembargo esakinan konforme publikashon di FFK, lo hunga awor riba tereno di Stadion Antoine Maduro na Kintjan.

E motibu eksakto no ta konosí, ounke ku tin rumornan insistente indikando ku FFK no a logra yega na un akuerdo ku FDDK pa uzo di SDK, debí ku FFK no ta di akuerdo ku parti di kontenido di e kombenio ku mester firma pa asina hasi uzo di e stadion. Un ke otro, unda nan no ta di akuerdo, ku e responsabilidat ku lo ta duna nan i/òf te kon leu nan lo mester ta responsabel, durante di weganan di futbòl FFK, den Stadion Ergilio Hato.

Miéntras ku lo trata na yega na un akuerdo, bala lo lora na Kintjan, unda dirigentenan aki tambe ya ta planiando un strategia pa asina kosnan kana nechi i sigur ámbos partido ta kontentu.

Miéntras tantu e weganan bálido pa e segundo seri di aktual temporada, ta weganan ku lo hunga durante di e fin di siman benidero, riba dianan djabièrnè, djasabra  djadumingu próksimo.

Kos ta inisiá djabièrnè ku Centro Barber enfrentando Jong Holland, pa 8’or di anochi.