‘Swim Club Orca Curaçao’ kampion den waterpolo na Boneiru

117
Miembronan di e organisashon Orca.
WILLEMSTAD—Direktiva di ‘Swim Club Orca Curaçao’ por mira bèk, riba algun dia super eksitoso na Boneiru. Un ke otro pa e disiplina di waterpolo señor dama i pa e disiplina di waterpolo señor kabayero.

Tur dos ekipo a titulá kampion durante di un torneo, organisá pa e klup di landamentu i waterpolo di e isla di flamingo, Baracuda’s. Apesar ku e ekipo di waterpolo di Aruba na último momentu a kai afó, esaki pa motibu ku tur e buelonan di un kompania di aviashon di djabièrnè a keda kanselá, tòg tabata un fin di siman ku hopi logro pa Orca.

Tabata un delegashon di 20 persona, konsistiendo di atleta i dirigentenan, kende a biaha pa Boneiru pa partisipá na un torneo di Waterpolo. Tur wega a kuminsá na ora i tur kos a kana manera mester ta.

E torneo, “3rd Bonaire International Water Polo Meet”, a tuma lugá dilanti di Parke Tului i na Noordpier.

Orca señor dama a gana tur su kuater weganan kontra di Baracuda’s. Esakinan ku skor di 12-5, 19-3, 14-8 i 15-5.

Orca señor kabayero tambe a gana tur su kuater weganan kontra di Baracuda’s. E skornan tabata di 22-9, 19-2, 13-10 i 13-4.

Ya ta di 3 aña kaba ku e dos ekiponan aki ta kompetí ku otro dos biaha pa aña. E aña aki e ekipo di Aruba tambe a djòin, unda ta ripara ku e ekiponan a bai dilanti.

Direktiva di Orca ta gradisí tur atleta pa nan komportashon i prestashon, coach pa e gran trabou ku a desplegá promé ku e biahe i na Boneiru. Direktiva ta hopi gradesido na tur miembro.