Jemyma Betrian den semifinal na India

190
Ornella Wahner, kende ta Jemyma su kontrinkante den semifinal.
INDIA—E atleta di nos, e bòksdó femenino di 27 aña di edat, Jemyma Betrian, lo bringa mañan den semifinal di e kampionato mundial di bòkseo pa partisipantenan femenino.

Un ke otro den kategoria pa partisipantenan te ku 57 kilo, na momentu ku e topa e aleman Ornella Wahner di 25 aña di edat. Ta trata aki di e kampion di mundu 2011, den kategoria junior (U-19)

Un triunfo mañan pa e YDK, lo nifiká ku Jemyma, djasabra lo ta den e gran final buskando e titulo mundial, den kampionato ku e la hasi su debut.

Tras di lomba ya e tin 4 triunfo, den 4 pelea realisá den e kompetensia mundial aki, unda diferente di e faboritonan a keda kòrtiku, den e lucha kontra di e mucha di nos, ku ta den representashon di Hulanda, na New Delhi India.

Tabata na yüni, ku pa promé biaha ku Jemyma a kompetí komo un bòksdó Pròf den kompetensia nashonal na Hulanda i awe ta hasiendo furor den un kampionato di mundu.

“Ta trata aki di un regalo for di shelu.  Nos tur ta kontentu kuné. No mester pone muchu preshon, paso ya e la sigurá un premio kaba. Jemyma ta hasiendo tur kos fantástiko”, e coach hulandes Hennie van Bemmel a duna di konosé, komentando di e mucha di nos.