‘Curaçao Baseball Week 2018’ ta inisiá awe

238
Peloteronan durante di e Meet & Greet na 2017.
WILLEMSTAD—Awe djabièrnè dia 23 novèmber 2018, ta fecha pa inisio ofisial di “Curaçao Baseball Week 2018”. Un ke otro, na momentu ku lo bai tin un Meet & Greet na Blue Bay, speshalmente pa spònser, peloteronan i tambe prensa. E siman di beisbòl aki, ta programá pa kontinuá ku diferente aktividat i lo bai tin durashon di un siman, pa finalisá dia 1 desèmber próksimo.

Despues di e fecha di apertura awe, mañan djasabra dia 24 novèmber 2018, lo bai tin un seminario pa coachnan, inisiando 9’or di mainta, pa finalisá 4’or di atardi na Parke Tio Daou.

Riba e mesun fecha aki, mañan djasabra dia 24, seguidamente lo bai tin un ‘Meet & Greet’ i promoshon di e evento. Un ke otro lo dura entre 4’or i 6’or di atardi i lo tuma lugá na Sambil.

Miéntras tantu asina lo sigui ku aktividat riba tur dia, pa loke ta e siman benidero, unda ta programá pa bai tin entre otro klínika, showcase, weganan di streanan, dia habrí i inkluso un torneo di gòlf na Old Quarry.

Tur esakinan, unda mayoria di nos peloteronan profeshonal, tambe lo ta presente, pa asina di nan banda duna bek na nan isla i tambe duna un man den desaroyo di nos isla i tambe nos hóben peloteronan.