Warwarú ta sigui gana den vòlibòl

154
Akshon den wega ku Warwaru a gana Watakeli.
WILLEMSTAD—E kampionato di vòlibòl, organisá pa FeVoKo, a kontinuá den sala Errol Rooi na Sentro Deportivo Kòrsou. Esaki na momentu ku tabatin 4 wega ku a mira akshon. Tur den klase A, repartí, ku 2 den kategoria femenino i otro dos den maskulino.

Maskulino

Den maskulino e ekipo di Xaverianen a gana e lucha den enkuentro ku nan a enfrentá e ekipo di Green Tigers. E partido aki a finalisá 2-1 (25-21, 17-25 i 15-7). Tabata e wega mas emoshonante di anochi, ku ekiponan den un lucha tenas ku otro pa e triunfo.

E ekiponan di Watakeli i Warwarú tambe a topa otro riba e anochi aki. Un ke otro unda ku e ekipo di Warwarú ta sigui ku nan racha ganadó. E biaha aki, Watakeli tabata e víktima, unda nan a gana di nan ku sètnan ku a kaba ku skornan di 25-12 i 25-21, na momentu ku e wega a finalisá 2-0.

Femenino

Miéntras ku den kategoria femenino, Hurricane sorpresivamente ta derotá e aktual kampionnan Shuatanari, ku skor di 2-1, ku sètnan di 25-20, 18-25 i 16-14.

Den e otro enkuentro bálido pa e kategoria femenino, tabata e ekipo di Stakamahachi, ku ta logra pa derotá Xaverianen 2-0. E wega aki a finalisá ku parsialnan di 25-18 i 25-12.

E kampionato ta sigui djadumingu benidero na SDK, ku diferente partido, unda ku e ekiponan den kategoria klase A i superior, tantu den maskulino komo femenino lo bai ta den akshon, inisiando for di 4’or di atardi.