Konsierto Urban Deluxe a ser kanselá kuater dia delantá

199
E tambe mester a presentá djasabra awor den urban Deluxe.

WILLEMSTAD,—-Ayera a drenta informashon na mesa di redakshon di ‘E Mulina’, ku e Konsierto grandi Urban Deluxe, ku mester a tuma lugá djasabra awor a ser kanselá, motibu di esaki tabata pa e famoso pèrmit, nos a haña informashon ku den e siman ku e aktividat mester a tuma lugá, promotornan di e evento a haña informashon ku esaki a keda kanselá.

E motibu di esaki ta ku outoridatnan a rechasá e pèrmit ku mester a wòrdu otorgá, pa e evento por a tuma lugá na Boogjes Waterfront Arena. E organisashon BEEHIVES ta lamentá esaki mashá, mirando ku a entregá tur petishon pa pèrmit na tempu manera ta stipulá den regla i tur kos tabata na òrdu. Apesar di esaki, apénas 4 dia promé ku e evento e pèrmit a wòrdu rechasá pa motibu ku outoridatnan no ta haña e lokalidat safe.

Apesar ku outoridatnan a proponé un otro lokalidat, BEEHIVES komo un organisashon responsabel, a tuma e desishon di kanselá e evento te ku un próksimo aviso. E motibu di esaki ta ku BEEHIVES ke garantisá e mesun nivel i kalidat di semper ku Kòrsou a kustumbrá kuné. Esaki lo tabata e di 4 edishon di e evento tan gustá kual ta URBAN DELUXE, ku e biaha aki tabata pinta di bira un éksito rotundo un biaha mas, ku presentashon di headliners JEON & IRSAIS, tambe RITMO REAL & DA RIDLAZ i vários supporting acts.

Tur persona ku ya a kumpra nan karchi por tuma nan sèn bèk na e mesun punto di benta kaminda nan a kumpra esaki. Nos ta gradisí di antemano pa boso komprenshon i danki pa aseptá URBAN DELUXE masalmente un biaha mas. BEEHIVES lo sigui traha duru pa pronto duna pueblo di Kòrsou un otro evento di nivel haltu.