Temblor di 3.8 grado ta sakudí Argentina

40
Sitio unda e temblor a keda registrá.

BUENOS AIRES – Den oranan di ayera, miéntras tabata hasi inisio di kumbre di grupo di 20 (G-20), aya na Buenos Aires, e kapital di e pais i alrededor di esaki a sinti un temblor.

Segun diferente fuentenan, e temblor aki tabatin un magnitut di 3.8 grado di magnitut i a kda sintí pa vários personanan.

E echo aki a yama hopi atenshon i a keda notifiká pa diferente usuario di retnan sosial, ya ku e region aki no tin kustumber di registrá aktividatnan di temblor. Inkluso a indiká ku e último biaha ku e registrá esaki, e movementu tabata mas ku un siglo pasá, na aña 1888.

Algun persona a hasi uso di retnan sosial pa ekspresá nan mes i a skibi basta spantá relashoná ku e situashon i e temblor ku a keda sintí. E fenómeno aki a laga un sintimentu di miedu atras despues ku el a keda registrá. Otro nan a disidí di tuma esaki ku basta humor i tambe a hasi uso di retnan sosial pa skibi di esaki, pero den forma nan mas kómiko.

Segun diferente testimonio di esnan ku a sinti esaki, e temblor a afektá inkluso e siudat di La Plata, kua ta situá na 60 kilometer sùit di e kapital argentino.

Outoridatnan di e pais no a reportá ku tabatin dañonan di gravedat registrá pa esaki i tampoko a indiká ku tabatin personanan ku por a resultá heridá. Esaki simplemente a kousa un sustu chikitu pero nada mas.