Cleopa dirigí ku pregunta riba bòikòt den CRU pa gana sèn

65
Punda—Miembro di Parlamento Eugene Cleopa, ayera tabata bastante efektivo ku su preguntanan durante di dos tanda riba un reunion públiko den Parlamento. Ta trata di un reunion pa trata eskoho di un sosio nobo pa Refineria Isla.

CRU aktualmente tin hopi problema i ta mal pegá. E kompania ta birando tópiko serio di kombersashon i nivel haltu di korupshon. Pa algun tempu kaba, ta sirkulando rumornan ku empleadonan na CRU, ku mala fe ta pegando mashin i instalashon pa duna trabou na kontratistanan amigu unda tin pago a kontra. Esaki ta un sospecho komun den mundu di kontratista ku ta sirkulando.  Miembro di MAN den Parlamento den segundo tanda a lansa un pregunta règt pe por haña splikashon indirekto riba “bòikòt” di ekiponan riba tereno di CRU.

Segun Cleopa, tin situashon unda riba mala fe ta pusha entre otro papel pa verstòp mashinnan riba tereno di CRU. Vigilante tambe a yega di haña informashon similar riba esaki, i ayera Cleopa a manda puntra meskos. Aparentemente ta pegando e mashinnan pa laga kompanianan kontratista subi tereno di CRU i gana sèn pa drecha mashin. Direktor interino Chonky de Lanoy a duna di konosé ku e no ta na altura di esaki.