Den promé wega di e seri final Jandoret Raiders ta laga Bulldogs den tereno 3-2

171
Sedeney “Spin’ Lourens despues di basta tempu a bai 6 inen kompletu tirando den gran forma lagando e wega 2-2.

Willemstad,– Finalmente despues ku un palu di awa a kai i para e promé wega di playoff final beisbòl veterano entre Jandoret Raider i e ekipo di Bulldogs, ayera si kosnan a sigui ku un tremendo wega kaminda e dos ekiponan a presentá kompletu i duna tremendo bataya.

Tabata e ekipo di Jandoret Raiders ku ta bai ariba 2-0 riba hit empuhadó di Renato Anasagasti despues di 3 inen di tremendo duelo di picheo entre Sedeney ‘Spin’ Lourens i Deron “De’ Clara.

Nato Anasagasti ta konektá hit ku base den di kuater entrada pues pa Jandoret bai dilanti 2-0.

Ku e skor 2-0 den kabes di sinku Kelvin Winklaar ta sali risibí base por bola, pero e siguiente lansamentu Deron Clara ta sali i bai primera pa sorprendé Winklaar pa e promé out.

Ta sigui hit pa senter pa despues presentá doblete pa right ku lo mester a hasi e wega 2-1 sin out si Kelvin Winklaar lo no a sali out. Pero ta keda kore na segunda i tersera ku un out kaminda ta bini un flai di sakrifisio pa hasi e wega 2-1 i finalmente di tres out ta kai.

Den kabes di seis e ekipo di Bulldogs ta skor un kareda mas pa empatá e partido dramátikamente na 2 kareda.

Ku e skor 2-2 maneho di Bulldongs ta haña ku ta basta pa Spin Lourens i nan ta trese e surdo Lester Victoria i Spin ta bai hunga den leftfield.

E di dos lansamentu di Lester ta bira un lansamentu kaminda ku Mayron Wijman ta konektá un bataso ku ta baña e leftfielder Spin Lourens pa un doblete. Ta sigui un hungada di toke kaminda Wijman ta pasa pa tersera i Geyo Zimmerman ku a pone toke a bira promé out. Ta sigui base por bola intenshonal pa e pinch-hitter Elmus Poulo. Maneho di Bulldogs ta opta pa picha Mayron Martinus i no dun’é base imtenshonal pa buska out na home. Riba konteo di 1 bola dos strike, Mayron ta konektá un roletaso bon pa double play pa sera e inen, pero e bala ta bòns malu i dal den e shortstop Sor Mosquit pa asina e kareda di viktoria anotá den pianan di Mayron Wijman.

Asina pues e ekipo di Jandoret Raider ta pika dilanti 1-0 den e seri mihó di tres, rumbo pa nan di kuater titulo sigui den e kampionato di beisbòl veterano.

Deron Clara a seis inen i a haña relevo di Johnny Balentina kende a terminá e partido i a bai ku e viktoria riba su nòmber miéntras ku di otro banda Lester Victoria kende a relevá Spin Lourens den último inen a karga ku e derota.