Stanley Clementina ta kla pa fin di aña ku piesa nobo“Papia Mi Bon”

338
“Papia Mi Bon” ta otro piesa nobo di Stanley Clementina.

WILLEMSTAD,—-Kantante i kompositor Stanley Clementina su último produkshon pa fin di aña ta diferente di loke nos a kustumbrá di dje. “Papia Mi Bon” ta un kolaborashon entre Stanley i e talentoso ingeniero musikal Albert Windster, eks integrante di banda OK.

Huntu nan a modernisá e kantika original di famoso kompositor Tío Sha i a eksperimentá ku e simadan Boneriano i Afrovibez, Stanley su signatura rítmiko. Kuater luna pasa, Albert a konta Stanley di señor Richard Martina, mihó konosí komo Tío Sha, ku na 2010 tabata toka den un grupo musikal folklóriko boneriano Rundan huntu ku Albert.

Según Albert, semper e fiestanan tabata yen, yen, pero nunka e grupo a saka e kantikanan riba un disko kompakto, loke semper tabata su deseo. Den Stanley, Albert a mira e persona perfekto pa interpretá un dje piesanan, i asina “Papia Mi Bon” a keda realisá.

“Papia Mi Bon” ta un himno ku ta urgí tur pa ora papia malu di hende, no lubidá pa papia su bon tambe. E clip di ‘Papia Mi Bon’ a keda editá pa Stanley mes i a keda graba den un ambiente di famia. Akí Stanley kier a kaptura e ambiente mágiko di fin di aña ku tur famia kurasoleño ta eksperensiá. Den 2019, tin kosnan grandi den tapara pa Stanley unda e lo lansa vários produkshon nobo, kolaborando ku diferente artista Urbano di tanda.

P’e motibu ei, Stanley no lo partisipá den e próksimo Festival di Tumba, apesar di ta ’tin un eksperensiá inolvidabel. Gòrda pidi na tur radio emisora i televishon popular pa “Papia Mi Bon” i ‘like’ su Facebook.com/StanleyAcoustic òf bishitá www.stanleyclementina.com pa keda na altura di futuro presentashon. Tambe por wak e clip di ‘Papia Mi Bon’ riba su página di You Tube https://youtu.be/5Xm.