20 aña di prizòn pa tata di kriansa ku a abusá seksualmente di mucha di 8 aña

36
E hòmber a keda sentensiá na 20 aña den e kaso aki.

SANTO DOMINGO – Un hòmber a keda kondená na 20 aña di prizòn pa abusá seksualmente di un di su yunan di kriansa di 8 aña di edat, echo ku a keda probá ku pruebanan den su kontra, durante un huisio pa Ministerio Públiko di Santo Domingo.

E kastigu a keda imponé kontra e akusado despues ku el a keda deklará kulpabel di abusá físika i mentalmente di su yu muhé di kriansa. E nòmber di e hòmber i di e menor di edat no a keda divulgá pa asina protehá identidat di e víktima.

E sentensia, ku lo tin di keda kumplí den e sentro i detenshon nashonal La Victoria, ta debí na e lei ku ta kastigá insesto òf akto seksual ku engaño òf violensia i tambe e kódigo di protekshon i di derechinan fundamental di menornan di edat.

Durante tratamentu di e kaso, kua a keda realisá den e Promé Tribunal Kolegiado, fiskalnan di e distrito hudisial a detayá dilanti wes su investigashon i a presentá pruebanan ku a demostrá ku e hòmber a kometé e loke e ta keda akusá di dje.

E representantenan di Ministerio Públiko a splika ku durante di e investigashonnan por a establesé ku e tata di kriansa, kende tabata gosa di konfiansa di e famia, tabatin kustumber di mishi ku partinan íntimo di e menor di edat, probechando ousensia di esaki su mama.

E informashon, ku a keda ofresé via di un komunikado di prensa, a indiká ku e denunsia den e kaso aki a keda risibí pa e Unidat di Atenshon Integral di Víktimanan di Violensia di Género na Santo Domingo dia 31 di yüli di aña 2017. Tabata for di e momentu aki ku a inisiá ku e proseso hudisial te na momentu ku a logra e sentensia.