Aqualectra; Koriente por bai entre 3 pa 10 desèmber

77
Otrobanda– E pronóstiko di produkshon di koriente di e siman aki ta mustra ku entre djaluna i djarason Aqualectra su reserva di  kapasidat ta di tal manera ku no por ekskluí interupshon di koriente na sierto momento di dia.

Disponibilidat di koriente ta dependé engrande di e kapasidat di produkshon ku por konta kuné for di kada unidat ku ta produsí koriente i aktualmente  debí na un fayo na mashin 1 na e planta di Man Diesel riba tereno di Isla, e kapasidat  di reserva ta mínimo.E fluktuashon kontinuo diripiente di bientu e dianan aki ta hasi e reto aún mas difísil pa por pronostiká ku mas ku eksaktitut e ekspòrt di mulinanan di bientu.P’esei Aqualectra ta sigui hasi esfuerso pa hasi komunidat mas konsiente di e kapasidat di koriente ku tin disponibel, tambe e demanda di koriente i ta publiká un skema ku e pronóstiko di produkshon i demanda di koriente semanalmente.

Na un forma simpel ta duna komunidat un bista kla di e kapasidat proyektá di produkshon di koriente di su plantanan na Dokweg, su planta disel riba tereno di Isla i e turbina di gas na Mundu Nobo banda di e loke ta keda produsí pa e parke di mulina na Tera Kora, CRU i Aggrekonan.

Un apelashon na komunidat pa usa koriente di un forma mas konsiente semper ta keda bálido den situashonnan asina aki, for di djaluna te ku djarason, ku sigur lo yuda den e demanda di koriente durante dianan. Asina na un forma responsabel, nos mes tin e konsumo di koriente den nos mes man teniendo kuenta ku e kapasidat di koriente disponibel. Riba nos wèpsait por haña tepnan importante kon hasi uso responsabel di awa i koriente.

Tur siman riba Aqualectra su wèpsait, su página di Facebook i den avisonan den korant lo por tuma nota di e proyekshon di produkshon pa kada unidat ku ta kontribuí na e kapasidat máksimo ku Aqualectra tin na koriente kada dia, plus e demanda pik. Asina komunidat tin un bista kla kon ta pará pa loke ta produkshon i distribushon di su koriente, esaki komo parti di e responsabilidat di un kompania modèrno di utilidat.