Diego de Freitas ta gana den “Victorious Fighters”

174
Diego de Freitas a resultá e ganado.
WILLEMSTAD—Durante di e fin di siman tras di lomba, tabatin un eksitoso promé edishon di “Victorious Fighters”. Ta trata aki di un kompetensia pa hóben deportistanan kende ta profilando den e deporte di kickboksing, ku ta un konsepto nobo riba nos isla.

Tabata evento ku a mira akshon, na e skol di e deporte aki, ku ta karga di nòmber Team Farao, na Otrabanda, dilanti di un tremendo públiko i gran ambiente.

Partisipantenan relativamente hóben a mira akshon luchando kontra otro, unda ku tambe tabatin partisipante for di Aruba.

E programa di dia a inisiá, unda e dos talentonan lokal, Sou-Gie Seraus (Team Farao) i Nahdir Haseth (Attaf Fighting Factory), a topa otro. Tabata Nahdir, ku a logra e triunfo, ora ku rèfri mester a para e pelea den di 3 asalto.

Seguidamente a tuma lugá e pelea entre e partisipantenan mas hóben, ku a mira akshon den e programa. E junior di Queño, kende ta Diego de Freitas (Team Farao), di 9 aña di edat, a enfrentá Yigal Kurt (Never Doubt) for di Aruba, kende tambe tin 9 aña di edat.

Diego “Queño Jr” de Freitas, a logra e triunfo, dunando tremendo pelea, pa asina di forma konvinsente logra e titulo, pa puntuashon riba su kontrinkante.

Seguidamente tabata Sirio van Es (Team Farao), ku tambe ta gana di Joshua Rojas (Attaf Fighting Factory), den di 2 asalto di e pelea.

Quinten Plein (Team Farao), a keda kòrtiku pa punto, den pelea kontra Kieyon Henriquez (Never Doubt/Aruba).

Den pelea ku a bai 3 rònt, Chising de Jongh (Team Farao), a logra gana di Shurten Baromeo (Attaf Fighting Factory), pa puntuashon.

Miéntras ku den e pelea prinsipal di e anochi, tabata Ronin Prince (Team Farao), kende a gana di Shawn Arends (Never Doubt, Aruba), den di 2 rònt pa nòkout.

Tabata un tremendo programa, unda esnan presente, sigur a gosa di loke nan a haña mira, ku e hóben deportistanan den akshon.