Dj Sidney Stefania a pasa pa Radio Deltha 92.7 FM

51
Ayera e la kuminsá ofisial na Radio Deltha 92.7 FM.

WILLEMSTAD,—-Grandi nan tin un dicho ta bisa ku ‘Peñadó no sa pena largu’. Algun luna tras di lomba ‘E Mulina’, a bin ku e informashon ku e legendario Dj Sidney Stefania a bandoná Radio Fiesta FM. Despues no a bini ku e informashon ku e mes un Dj aki lo bai kuminsá laborá na Radio Hoyer, pero aki algun lo a bai robes ku e negoshashon nan a pega.

For di siman pasa nos a haña informashon ku Dj Sidney Stefania su stèm ta zonando na Radio Deltha 92.7 F.M. den ora nan di mèrdia, pa ta eksakto di dos or pa 5 or di atardi. Esaki a pone ku mes ora nos a bai pone mas atenshon riba e orario, pa asina nos mes tende ku si di bèrdat Dj Sidney Stefania ta toka na e Radio ariba menshoná.

Tal manera ku nos fuente a bisa nos. Mes ora nos a drenta den kontakto ku Sidney Stefania, pa asina nos tende kiko tin di bèrdat ku e moveshon en kuestion. Bèrdat manera ku nos a keda informá Dj Sidney Stefania tambe a konfirmá na nos.

Esaki ta loke ku Dj Sindey Stef a bisa ‘E Mulina’, “T’asina ku for di djarason mi a kuminsá, pero esaki tabata djis un transmishon di prueba, ayera tabata e dia ku mi a kuminsá ofisial na Radio Deltha 92.7 F.M. kaminda ku lo bai tei di djaluna pa djabièrnè for di 2 or pa 5 or di atardi, pues awor tur mi fanátiko nan por sigui manera ku semper nan a hasi na Radio Deltha 92.7 F.M.”.