Kòrsou a gana ‘Schotborgh Cup 2018’ na Boneiru

43
Korsou kampion den biar na Boneiru.
WILLEMSTAD—Federashon Biar Kòrsou ta sumamente orguyoso di su selekshon. Un ke otro, unda miembronan a saka kara di e federashon i tambe Kòrsou, na Boneiru. Esaki ganando e evento “Schotborgh Cup 2018”.

E selekshon tabata formá pa Jeffrey Nieuwenhuyzen, Sybren Boekhoudt, Gemayel Rol, Shandro Paula i tambe Michael Arvelo, bou di direkshon di kapitan Hugo Limon.

Nan a duna tremendo bataya pa asina regresá kas ku e titulo. E evento a tuma lugá den Sporthal Jorge Nicolaas na Playa.

E promé anochi di e kompetensia a bai poko pèrtá ku Kòrsou dilanti 4-3. Siguiente dia a kontinuá i nos selekshon no a baha kabes, unda ku respaldo total di e veterano Michael “The Bad Guy from Jerusalem” Arvelo, a bolbe sera e dia ku bentaha amplio, di 9-5.

Faltando 2 punto pa bai ku e titulo, nos duo formá pa Boekhoudt i Rol, ta pèrdè e promé partido di dia kontra rumannan Abdul, ku skor 9-6. Arvelo ta bai mesa i ta gana e number 2 di Boneiru, Janiro Chatlein, pa asina trese nos mas serka di e viktoria.

Tabata aki ku a toka turno na Shandro Paula, kende a bai mesa desidido pa kaba kos i e ta logra un tremendo viktoria, ganando Marnix Abdul 5-2, pa asina duna Kòrsou e titulo máksimo.

Ku e skor final 11-6, Kòrsou a bira kampion di “Schotborgh Cup 2018”, i asina empatá e seri na 3.

E veterano Michael Arvelo a sali e “hungadó mas balioso” di e evento. E la gana tur su 5 partidonan.

Federashon Biar Kòrsou ta felisitá su selekshon ku a trese e titulo kas i for di awor ta kuminsá ku preparashon nan pa e evento aki, ku lo tuma lugá, otro aña, na Kòrsou.