Scherpenheuvel ta habri siman komandando

89
Akshon di wega entre Scherpenheuvel i Jong Holland.
WILLEMSTAD—E kampionato di futbòl FFK den Promé divishon a sigui durante di e fin di siman ku ta tras di lomba, ku 4 enkuentro. Tur a mira akshon den Stadion Antoine Maduro na Kintjan. Tantu djasabra komo djadumingu, tabatin 2 partido.

Scherpenheuvel – Jong Holland

Primeramente tabata djasabra ku den promé ora, Scherpenheuvel ta derotá Jong Holland ku skor di 2-0. Nicolas Rocha Gomes i Na-JIr Peny tabata esnan ku a anotá, pa asina Scherpenheuvel mantené e liderasgo, despues ku tur ekipo a hunga 3 wega.

Centro Barber – S.U.B.T.

Den e di dos wega di anochi, kual tabata un gran partido, ku S.U.B.T. dunando un tremendo futbòl sin a probechá di e oportunidatnan klave ku a presentá pa anotá, ta empatá na 1 gol ku Centro Barber. Rogyear Anita a anotá pa Centro Barber, miéntras ku Gustavo Lopes Dorado a sòru pa e empate, pa e ekipo di Kintjan.

Inter/Willemstad – S.U.B.T.

Miéntras tantu ayera den e promé wega ku a mira akshon, tabata Inter/Willemstad ku ta logra triunfo pa goliada riba Jong Colombia. Vaylison Lake, Christopher Willemse (2x), Joward Hogebergen i Stallone Isenia, a anotá pa e ekipo ganadó, miéntras ku Christopher Martha a deskontá via un tiru penal pa e samineronan.

Centro Dominguitu – Victory Boys

Finalmente e fin di siman di futbòl a tèrminá ku Centro Dominguitu, logrando triunfo mínimo riba Victory Boys. Norman Hoyer a sòru pa e gol ku kabes, for di riba un tiru di skina.

Kontinuashon

E kampionato di futbòl FFK den promé divishon ta sigui djabièrnè awó, dia 7 desèmber 2018, pa 8’or anochi na Kintjan mes, ora ku Centro Domingitu topa ku e doñonan di kas, S.U.B.T.