Singelmar Hose a pone otro piesa nobo riba merkado

38
Awe su piesa nobo ta kuminsá zona na diferente radio emisora lokal.

WILLEMSTAD,—-E hóben kantante yu di Kòrsou Singelmar Hose ku ta biba na Hulanda, un biaha mas ta bolbe pone un piesa nobo riba merkado, ta trata aki di un piesa ku ta den género di Ritmo Kombiná, titulo di su piesa nobo ta “Pa Bo So”.

T’asina ku Singelmar su piesa ta un komposishon i areglo di otro yu di Kòrsou ku ta Jeanalbert Margarita. Ya for di awe e piesa nobo di Singelmar ta bai kuminsá zona na diferente radio emisora na Kòrsou, i tambe riba e sistema nan di ret sosial nan ku tin.

‘E Mulina’, tin informashon ku si tur kos kana manera mester ta, pa otro aña e hóben kantante yu di Kòrsou, lo bai tin algun presentashon na Kòrsou. Pa otro siman nos ta bin ku mas informashon rondó di e hóben kantante yu di Kòrsou Singelmar Hose, ku sin duda ta hasiendo un bon trabou na Hulanda.

Pues si bo tambe ke tende e piesa di mas nobo di Singelmar Hose, libramente bo por yama na bo radio emisora preferí i pidi pa e piesa. Ta bon pa nos mes ban sostené nos mes un artista nan, paso na final di dia, ta nos mes un hende nan, nos no mester laga te na momentu ku nan ta den mal kaminda, e ora ei nos ke papia di nan. A yega e ora pa nos ban kuminsá na alsa nos mes un artista nan 100%, despues no por wak pa otro nan.