Stakamahachi pèrtá riba Titus

147
Akshon den volibol.
WILLEMSTAD—E kampionato di vòlibòl a kontinuá ayera anochi den Sala Errol Rooi na SDK, ku weganan di klase A. Den femenino, Stakamahakchi ta derotá Hurricane ku skor di 2-0 (25-19, 25-14).

Den e sekshon maskulino, Watakeli ta superá Xaverianen, despues di gana e promé sèt 25-10 pero e hóbennan di Xaverianen a duna mas resistensia den e di dos sèt, pero a keda kòrtiku i Watakeli ta pone e wega riba nan nòmber ganando e di dos sèt 25-20.

E último wega di ayera a bai entre Stakamahakchi i Titus. E wega aki tabata unu super emoshonante. Titus ta sali brabu i kue e promé sèt 25-17. E di dos a tèrminá ku mes un skor (25-17) pero biaha aki na fabor di Stakamahakchi, ku a bin bèk den e wega i forsa e sèt desisivo.

Den e di tres, e wega a bai punto pa punto i tabata Stakamahakchi ku a skor e punto # 15 lagando Titus ku 13 punto.

E kampionato ta kontinuá mañan anochi ku 2 wega den Klase maskulino superior. Watakeli i Stakamahakchi lo hunga kontra otro riba kancha #1 i na mes momento Xaverianen i Titus lo inisiá nan bataya riba kancha dos.

Dos bon motibu pa bai Sala Errol Rooi mañan 8’or di anochi, unda den e promé buèlta aki entrada ta grátis.