Van Engelen i St. Michiel ta komandá den Senior Brievengat Orioles invikto den RBI Junior

20
Willemstad,– Despues di ‘All Star Break’ i Curaçao Baseball Week, kampionato di RBI Curaçao 2018 a kontinuá ku vários wega den fin di siman. Un biaha mas áwaseru a pone ku mester a kanselá algun wega. Weganan ku ta tumando lugá ya ta di e buèlta di tripel eliminashon i pa e próksimo fin di siman ya ta bai haña ku algun ekipo ta bai kai afó.

Aktualmente den divishon Junior, e ekipo di Brievengat Orioles ta invikto ku un marka perfekto di 10-0 i su tras tin Trai Seru Dodgers ku un marka di 8-2. Den divishon Senior, Van Engelen Giants i St. Michiel Athletics ta kompartí e promé lugá ku un marka di 9-1 i ta sigui pa Sta. Maria Pirates ku un marka di 8-2

Djasabra ta solamente un wega por a tuma lugá na Montab debí ku despues ku awa a kai ya e estado di tereno no tabata unu pa por hunga niun wega mas. Den e úniko wega di djasabra den divishon Junior, Brievengat Orioles a gana pèrta di Montaña Ariba Diamonbacks ku skor di 4-3. Picher ganador tabata Failyson Anthony i Kendrick Kleinmoedig a bai di 2-2. Picher pèrdèdó tabata Tristan Calmes, Torregrosa i Martis ámbos a bai di 2-1 na bate pa Dbacks.

Djadumingu tur wega di tantu divishon Junior komo Senior a tuma lugá na Tio Daou Ballpark. Den promé wega den divishon Junior, Montaña Ariba Diamonbacks a bolbe kai vensí i e biaha aki na man di Marchena Reds ku skor di 10-5. Picher ganador pa Reds tabata Kevin Blindenburg i mihó bate tabata di Clyron Franklin di 2-2. Picher pèrdèdó tabata Yoelmy de los Santos i mihó bate pa  D’backs tabata Nathaniel Milton di 1-1. Despues Trai Seru Dodgers (Jr) a gana Amerikanenkamp Devil Rays ku skor di 7-0. E último dos weganan di ayera tabata den divishon Senior i tabata e ekipo di St. Michel Athletics ku tabata muchu fuerte pa Montaña Ariba Diamondbacks ganando fásilmente ku skor di 13-0. Picher ganador tabata Kaelen Wernet i Klevert Martina a bai di 2-2 pa A’s. Picher pèrdèdó tabata Algeron Martis i mihó bate pa D’backs tabata Reinita i Kleinmoedig ámbos di 3-1.  Finalmente Van Engelen Giants a gana di Trai Seru Dodgers ku skor di 7-6. Picher ganador tabata Lousandry Henriette i mihó bate pa Giants tabata Ray Jackson Chirino di 1-1. Picher pèrdèdó tabata Chris Balentina i mihó bate pa Dodgers tabata Jurrangelo Cijntje di 3-3.

Por sigui tur desaroyo di e kampionato via di e website nobo www.rbicuracao.com, unda por haña tur informashon, skema di wega, orario i resultadonan. RBI Curaçao tin su propio twitter account tambe bou di @Curacaorbi i ya manera sa kaba tin e página riba Facebook.

RBI Curaçao 2018 ta kai bou di ouspisio di Curaçao Baseball Development Foundation (CBDF) i kampionato ta bou di maneho di Fundashon pa Nan. Danki un biaha mas na MCB pa ta spònser prinsipal i Hensley Meulens pa donashon di tur bala i ku tur ekipo promé ku kampionato a risibí algun kaha di bala tambe pa nan respektivo organisashonnan i por último KNBSB.