2 hòmber a influensia hóben 18 aña pa tira víktima

214
Víktima ku a risibí tiru riba e dia en kuestion.
WILLEMSTAD,– Ta vários kaso penal mester keda tratá promé ku korte stòp di trata kaso pa desèmber, unda lo bai tin vários kaso interesante.

Djabièrnè awor 3 hòmber lo mester presentá dilanti wes pa un kaso basta serio ku tin kontra di nan. Ta trata aki di Davidson Vrutaal di 18 aña, Sherwin Anita di 31 aña i Jendelson Fecunda di 23 aña. Ta trata aki di un kaso ku ya a bin pro forma 5 di sèptèmber tras di lomba unda e sospechosonan tur tabata tei ku nan abogadonan.

Den e kaso aki tabatin petishon pa skucha vários testigu, ku probablemente lo ta kardinal pa tratamentu di e kaso. E kaso aki un kaso unda mester a intentá na asesiná 3 víktima, unda 2 di e víktimanan a presentá den sala di korte durante e pro forma. Tabata 17 di yüni tras di lomba ku mester a tira riba un víktima unda el a keda perforá pa 2 tiru riba e dia en kuestion.

Segun indikashon ku e 3 hòmbernan aki mester tabata den un outo unda a bin dilanti ku e sospechoso Vrutaal mester a los tirunan riba e víktima, kual 2 tiru a alkansá e víktima di fam S. na su pia. Durante e pro forma di e kaso e sospechoso di fam Fecunda huntu ku su abogado tabatin petishon pa skucha su mama, tata i tambe su ruman komo testigu pa e tratamentu den kontenido.

Tambe lo mester traha rapòrt di reclassering i sikólogo pa e tratamentu ku ta djabièrnè awor kuartu pa 10 di mainta. Tambe abogadonan a pidi pa skucha algun miembro di sel di e sospechosonan komo testigu den e kaso aki. E hòmber Fecunda a bisa wes ku e ta sera 3 luna pòrnada, miéntras su famia mester di dje pafó, unda tambe e la splika ku e ta sinti nan falta.

E sospechoso Vrutaal a bisa wes ku e ta lamentá ku e kosnan a bai asina i ku si e por a drai tempu beka lo el a hasié. Durante e pro forma di e kaso el a asta bisa ku lo ta bon si por regla pa e haña lès òf bai skol, òf sigui kurso den prizòn.

Ya bin dilanti den e kaso aki ku e hòmbernan Anita i Fecunda tin e sospechoso Vrutaal bou di menasa, unda a asta menas’é dilanti polis unda a traha prosèsverbal di esaki. Tur esaki mirando ku segun Ministerio Públiko ta pone preshon riba e sospechoso pa e no benta nan nòmber den e kaso aki.

Loke tambe tabata remarkabel durante e pro forma ta e echo ku abogado di Fecunda a trese dilanti, ku promé kos ku mester wak ku Vrutaal a tira di su mes òf en bèrdat a influensi’é pa hasi esaki. E kaso lo keda tratá djabièrnè awor unda e sospechosonan lo mester kontesta vários pregunta ku lo bin den na direkshon.