A haña Jamaloodin ta papia na telefòn den su sèl

487
Willemstad,– Señor Norman Serphos bosero di ministerio Públiko ta na Boneiru na e momentunan aki i el a keda aserka tokante di un telefon ku lo mester a haña den e sèl di señor George Jamaloodin aya na Boneiru.

Señor Serphos a splika ku hopi resien a bin haña den sel di Jamaloodin den e prison nobo na Boneiru un telefon selular. Serphos ta bisa ku Jamaloodin ta su so den su sèl i ku mesora Fiskal di Kòrsou a ordená pa hasi un investigashon tokante di esaki. E ta splika ku naturalmente hustisia ta interesá pa sa ku ken Jamaloodin a papia i a duna òrdu na prizon di Boneiru pa investigá kon bini i kon e telefon selular a yega den e sèl di Jamaloodin.

Serphos ta bisa ku no ta normal ni akseptabel pa un sospechoso tin telefon selular den prizon. Den e kaso aki Serphos ta bisa ku a apartá Jamaloodin pa seguridat i tòg ta bin haña Jamaloodin ku un telefon den su sèl.

Serphos no kier bisa ki dia a haña e telefon, pero e ta bisa ku no ta ayera, pero ta hopi hopi resien.

Entretantu direktor di prizòn na Boneiru a kuminsá ku investigashon i mester bisa ku ta masha poko hende por yega serka Jamaloodin. Segun Serphos tur hende ku no ta di prizòn ku por yega serka Jamoloodin ta ser debidamente kontrolá i tin kámara rònt di e edifisio nobo nobo aya na Boneiru.