Baranka ta titulá kampion sòfbòl Liga 50

29
Willemstad,– E ekipo di Baranka ayera nochi a titulá kampion di sòfbòl Liga 40 despues ku nan a logra un viktoria ku skor di 19 pa 7 kontra e ekipo di Crazy Tigers.

Mester bisa ku Baranka a gana e promé wega 13 pa 4 i despues Crazy Tigers a empatá e seri mihó di tres na un viktoria pa banda ora ku nan a gana ku skor di 6 pa 4.

Den e di tres i finalisimo partido kua tuma lugá ayera na parke di Suvek ku tribunanan lata lata di hende, Baranka ta bai ariba 3 pa 0 den bòm di promé inen ora ku e promé bate Rigobert Ciintje embasá riba base por bola i anotá riba hit di Jair Quant. Ta sigui Ramiro Balentina ku ta konekta homerun di dos kareda pa hasi e skor 3 pa 0.

Den kabes di dos un biaha mas Kenny Hellement ta saka sero kontra di Crazy Tigers miéntras den bòm di e mesun inen aki e picher di Crazy Tigers kende ta Jose Obispa ta habri ku base por bola pa Emerick Agatha i ta sigui hit di Charlie Merite pa despues di un out i ku base nan maneho di Crazy Tigers manda nan as picher Edichi Martina kensd ta dominá  Rigobert Cijntje ku un infieldfly i Jair Quant ta konektá un hit kombiná ku eror di e rightfielder pa bari base i tres kareda ta bin aden pa hasi e wega 6 pa 0. Ramiro Baletina ta sigui ku su di dos homerun di e partido pa hasi e skor 8 pa 0.

Den kabes di tres Kenny Helement ta bolbe saka un sero pa mantené su ekipo ariba 8 pa 0. Bòm di tres e ekipo di Baranka ta skor tres kareda mas riba doblete di Willy Reinita i hit empuhado di Emerick Agatha pa hasi e wega 9 pa 0. Kenny Hellement ta sigui ku doblete pa right kontribuyendo na su mes kousa empuhando dos kareda mas i pone e skor na 11 pa 0.

Kabes di kuater Luigi Yanez ta topa un lansamentu di Kenny Hellement i deposit’é tras di e fèns den senterfield empuhando tres kareda pa kòrta e bentaha na 11 pa 3.

Den bòm di kuater despues di base por bola pa Rigobert Cijntje, Jair Quant i Eldred Estanista e bateado Erling Gosepa ta konektá roletaso pa shòrt i un kareda ta skor riba fielder choice i Winklaar ta bati flai pa right pa sera e entrada ku e skor 12 pa 3 na fabor di Baranka.

Den kabes di sinku Crazy Tigers ta menasa pero ta keda na un kareda so ora ku Baranka kompletá un hungada di double play pa minimalisá e daño na 12 pa 4.

Den bòm di sinku despues di un out Charlie Merite ta konektá un bataso ku ta dal den bòrchi den senterfield i bin aden poniendo ku Merite ta kore un pasa te home pa hasi e wega 13 pa 4.

Kabes di seis Stanley Palm ta habri ku homerun solitario pa e di sinku kareda pa Crazy Tigers. Luigi Yanez ta sigui ku doblete pa left i despues di un out, Kora Sambo ta konektá homerun di dos kareda pa hasi e wega 13 pa 7.

Den bòm di seis e ekipo di Baranka ta logra kore ku e picher Martina i Obispa ta bin bèk pero e no ta logra wanta e bateria fuerte di Barnka ku ta skor no ménos ku 6 kareda pa pone e wega riba nòkout i asina tambe titulá kampion Liga 40 pa loke ta temporada 2018. Ku e skor 16 pa 7 i dos koredó na base Kelvin Winklarr ta konektá homerun pa laga Crazy Tigers den tereno 19 pa 7.

Pa Baranka  19 kareda, 14 hit i 2 eror. Kenny Hellement a gana bayendo e ruta kompleto  miéntras ku na bate Ramiro Balentina a bai di 4-3 ku 2 homerun konektá i Charlie Merite a bai di 3-2 ku tambe un homerun konektá i Kelvin Winklaar tambe ku homerun.

Pa Crazy Tigers  7 kareda, 11 hit i 2 eror. Jose Obispa a pèrdè i el a haña relevo di Edichi Martina pa despues e mes bini bèk i tuma e ultimo karedanan pa nokout. Na bate Luigi Yanez a bai di 3-3 ku un homerun konektá, mientras ku tabatin homerun tambe di Stanley Palm i Roderick ‘Kora” Sambo.

Ku esaki pues Liga 40 a klousura tambe temporada 2019 kaminda ku Baranka a sali kampion un biaha mas lagando Crazy Tigers komo sup kampion. Na di tres lugá a keda e ekipo di Gamers i Swift a keda ku e di kuater puesto.