Dimitri Leon vs Devon Meilink den final

50
Esnan ku a kompeti riba e prome fecha.
WILLEMSTAD—Federashon Tènis di Mesa Kòrsou a habri e siman aki, ku nan promé anochi di nan kampeonato nashonal. Esaki tabata djaluna último, kaminda e kategoria mas pisá a disputá den 4 grupo, kende ta bai bira su finalistanan.

Manera a antisipá, e dos mihó hungadónan rankeá ku a partisipá, lo tabata tambe e dos gran faboritonan.

Den semifinal Dimitri Leon ta sa di gana di Henny Metri 3-1, miéntras na e otro banda Devon Meilink ta derotá, e sorprendente hungadó Ravi Rajwani, kende pa promé biaha ta logra drenta den un semifinal di kualkier di torneonan ku a keda organisá. E wega aki, tambe a finalisá, ku e skor tambe di 3-1.

Pues e antesala pa un gran final djabièrnè awó, pa e titulo di Kòrsou ta kla. Dimitri Leon, kampeon di aña pasá, kontra Devon Meilink ku tabata kampeon di 2015.

Miéntras tantu kos a sigui ayera tambe, den e kategoria di Master, kaminda entre otro Raymond Begina, Hensley Wentwoord, Peter Wong i Lucien Alberg, tabata esnan den kompetensia.

E siman di weganan ta kontinuá awe i riba demas dianan benidero, tur anochi, na Sala Rekreo Irene Moreno, unda bo tambe ta invitá pa akudí i presensiá gran weganan di pinpòn.