Jurvenier Rijnschjot i Yvanleah Maria a logra Oro invikto

62
Yudokanan ku a representá Kòrsou na Barbados.
WILLEMSTAD—Durante di e fin di siman ku ta tras di lomba, nos selekshon di yudo, a kompetí na e di 18 ‘International Independence Judo Tournament’, ku a tuma lugá na Barbados. E evento aki ta tuma lugá tur aña riba e dia di independensia di e isla en kuestion.

E ekipo lokal tabata konsistí di Aemil Palm, Wendell Cathalina, Jurvenier Rijnschot i Yvanleah Maria.

Presidente di Federashon Yudo Kòrsou, Maritsela Braafhart a kompañá e ekipo komo entrenadó i tambe lider di ekipo.  Kòrsou a sa di saka kara i e resultadonan individual a pone ku Kòrsou a sali na di dos lugá, tras di e pais anfitrion den e kompetensia entre e paisnan ku a partisipá. Mayoria di esakinan tabata prosedente di e área di Karibe.

Tantu Aemil Palm, komo tambe Wendell Cathalina, a sa di gana medaya di Plata den e kategoria di partisipantenan di riba 18 aña di edat.

Esaki unda ku Cathalina, a bringa den e kategoria di peso te ku 81 kilo i Palm den e kategoria te ku 73 kilo.

Invikto i ganando medaya di Oro, a resultá e yudokanan Jurvenier Rijnschjot U-19 i den peso te ku 73 kilo i tambe Yvanleah Maria, kende a bringa den e kategoria pisá, di riba 90 kilo i kontra e atletanan riba18 aña di edat.

Federashon Yudo Kòrsou ta satisfecho i orguyoso ku e resultado di e ekipo, i ta yama tur nos 4 yudokanan i tambe e hefe di delegashon, masha pabien ku nan logro.