Karta ta konfirmá pa Gerrit yega awe mainta prizòn

95
Drenta: awe mainta Schotte ta drenta prizon pa sinta su kastigu.
Punda—Gerrit Schotte a risibí un karta, unda a keda konfirmá ku Ministerio Públiko ta spera su yegada pa djarason mainta na prizon Bon Futuro. Esaki ta lokual bosero di Ministerio Públiko a konfirmá na Vigilante ayera.

Den e karta tambe ta splika e eks promé minister di Kòrsou ku su kastigu lo ta pa 3 aña . Manera ta konosí, aparte di tei sinta 3 aña, Schotte tin kologá riba su kabes tambe un multa di 1.8 mion florin i si e keda sin kanselá e multa aki, ta bini 3 aña mas aserka. Durante su último rueda di prensa Schotte a kuestioná eks Abogado General, vd Schans. Schotte for di inisio di e tratamentu, tabatin problema ku e integridat di vd Schans.

Duda: aktuashon di vd Schans, kende a bandoná Kòrsou dos biaha ta wòrdu kuestioná pa Schotte

Hinter e inisio di e investigashon Babel ta basá riba un denunsia di Harry Verstappen na sèptèmber 2012  kombiná ku entre otro denunsianan na MOT i un karta di Fundashon Akshon sivil yüli 2012. Tambe tabatin un denunsia anónimo na òktober 2012, mas basá riba kuentanan di banko di Van der Dijs ku riba denunsianan na MOT. Durante segundo mitar di 2012, despues di e denunsianan, Ministerio Públiko a kuminsá buska informashon for di Italia den segundo mitar di 2012. Einan e problema ku vd Schans a start. Siguiente paso a bira un bishita di trabou na Italia den desèmber 2012. Abase di informashon prosedente di Italia, na yanüari 2013 Landsrecherche a start un investigashon di echonan. Riba resultadonan di e investigashon di echonan, a kondusí na yüni 2013 pa start un investigashon penal.

Defensa di Schotte semper a kuestioná e bishitanan di Italia i akusá vd Schans di aktonan ilegal durante kompilashon di prueba. Segun Ministerio Públiko esei no ta bèrdat pasobra  no tin indikashonnan konkreto ku a demostrá ku e kontaktonan entre Italia i Kòrsou a kana diferente for di loke ta aparesé den e dossier di e kaso ni den e prosèsverbal ku vd Schans a traha bou di huramentu. Segun Schotte, vd Schans lo a hasta huramentá falsu dilanti un wes komisario. Ta trata spesífikamente di un mail, supuestamente prosedente di fiskal italiano Roberto Pelicano. Dos abogado testigu, kende a wòrdu skucha a deklará ku Pelicano ta desmentí di a inisiá e kontakto pa interkambiá di dokumentashon, kontrali na lokual vd Schans a bisa. Den nan intento pa dek vd Schans, Ministerio Públiko a argumentá ku defensa di Schotte ta trata di krea konfushon dor di duna e dos abogadonan Italiano un interpretashon robes di deklarashonnan di vd Schans pa nan usa den korte.

Segun Ministerio Publiko,  vd Schans ku énfasis NO a deklará ku el a haña un mail firma pa Pelicano. E konfushona aki ta importante debi ku por tin e  posibilidat ta eksistí ku ta otro persona di OM Milan a manda e mail, den kual su identidat no ta konosí pa korte. E kontesta ta relevante segun defensa di Schotte, pasobra ta importante pa dedusí, fo’i unda e pruebanan di e dos fakturanan a sali ku a kondusí na inisio di e kaso kontra di Schotte. Segun Ministerio Públiko,  kon despues komunikashon entre OM Kòrsou i OM Italia tokante di e fakturanan a kuminsá, no ta relevante pa e pregunta si por a usa hañamentu di e fakturanan komo inisio di e investigashon kontra di Schotte na Kòrsou.