Segun Un Pueblo Patriótiko Riba tur e islanan den Reino Hulandes tin hende ku no ta komprondé e “Big Picture”

230
Nonoi: E bèrdat ta ku Hulanda tin su propio interesnan i bienestar na pechu, kual ta su derechi komo pais.
Willemstad,– Un grupo di siudadano bastante preokupá pa lokualnan ta pasa riba nos isla ku ta karga e nòmber “Un Pueblo Patriótiko” enkabesá pa Nonoi van Gurp, aserka Vigilante pa nan duna un splikashon di lokual nan ta pensa ta pasando riba nos pais. Segun e siudadanonan aki, pueblo mester kuminsá komprondé i laga su bos resoná.

Nan ta splika ku Reino Hulandes tabata tin siglonan pa por a pone e islanan riba un nivel a lo ménos un tono bou di esun di pais Hulanda.

Esaki pa medio di igualdat, edukashon, salubridat, guia den nos leinan i struktura i tambe kombatimentu di korupshon riba e islanan. Pero ora wak den spil awe, nos por mira ku esaki no ta e kaso.  Es mas, asina un polítiko ku tin e kualidatnan pa yuda kualke unu di e islanan haña popularidat, nos propio polítikonan ta yuda e polítiko Hulandes i un grupo lokal, pa kaba ku e polítiko en kuestion. Esaki ta e bèrdat.

Nos polítikonan lo kuminsá na manipulá ku e personanan aki ta mafioso i korupto. Nan lo yuda manipulá e pueblo tambe ku e manera di aktua di e personanan aki ta fresku, bulgar i for di tur regla. E manipulashon aki, permití i kousá pa nos propio gobernantenan, tin hendenan ta pensa ku Hulanda ta stima nos i ta protehé nos interesnan. Ku Hulanda semper tin nos interesnan i bienestar na pechu.

E bèrdat ta ku Hulanda tin su propio interesnan i bienestar na pechu, kual ta su derechi komo pais. E logro di e manipulashon di nos propio polítikonan, ta divishon di e pueblo. E divishon aki ta loke ta krea fanatisismo.

E fanatisismo ta pone ku awe e pueblo ta pleita ku otro, ken a hòrta mas òf ménos, ken ta korupto òf no, ku si nos por ta independiente òf no, si e pasaporte Hulandes ta importante òf no, sin dediká atenshon i analisá di un forma kritiko e método di operá di identidatnan ku tei pa salbaguardiá nos interesnan, nos bienestar, nos protekshon i kresementu, pero ku ta bou di kòntròl di e polítiko Hulandes.

Hulanda ta kontrolá Gobernador, ku na su turno ta kontrolá e gobièrnu.

Hulanda ta kontrolá hustisia ku ta pèrsigui solamente esnan ku Hulanda ke kita for di e mapa polítiko. Hulanda ta kontrolá finansa, pa e gobièrnu splikabo ku no tin fondo pa salubridat, mihó leinan laboral, enseñansa i edukashon.

No laga nos lubidá e grupo lokal ku a menshoná ariba. Esaki ta e personanan ku semper ta haña e funshonnan di kòntròl i manipulashon. Ta e persona nan ku no ta wòrdu retirá nunka for di nan funshon, maske nan prestashon no ta produktivo. E grupo di persona involukrá den múltiple korupshon ku a mira lus di dia kaba, pero ku nos hustisia no ta persiguí.