Sinku morto registrá despues ku trùk ta kai for di baranka na Nicaragua

30
Forma ku e vehíkulo aksidentá a keda despues di e insidente.

MANAGUA – Un total di sinku persona a pèrdè nan bida i otro 20 mas a resultá heridá na momentu ku un trùk di transporte kolektivo den kua nan tabata biaha a bai kai for di un baranka na e munisipio na nort di Nicaragua.

E trùk a bai kai den bashí, aparentemente pa un fayo den e sistema di brek. Ta trata aki di un karetera na e munisipio di Wiwilí de Jinotega, ubiká na 260 kilometer nort di Managua, segun e informashonnan preliminar. Esaki ademas a indiká ku e insidente aki a keda registrá den oranan lat di djadumingu tras di lomba pero e informashonnan relashoná ku esaki a bira konosí den oranan di ayera.

Mas di 20 persona mester a keda trasladá pa un sentro médiko, debí na e gravedat di nan leshonnan. Ademas a indiká ku entre esnan ku a pèrdè nan bida a keda identifiká komo Kelvyn Alfaro Cruz, Benarda Garcia, Santos Emiliano Montenegro Molina i e rumannan Mayrel i David Prado Zavala. Esaki nan tur ta personanan originalmente di Nicaragua mes.

E aksidente a keda registrá na momentu ku otro insidente similar tambe a tuma lugá i a laga saldo di dos morto den e mesun lokalidat.

Un total di 781 persona a pèrdè nan bida den e aksidentenan di tráfiko e aña pasá na Nicaragua i 791 na aña 2016.

E aksidentenan di kareteranan ta entre e kousanan prinsipal di morto na e pais aki, segun outoridatnan a indiká, ademas a indiká ku ta registrá un promedio di dies morto pa kada 100 mil habitante pa e echonan aki.