Testigu anónimo A79 a deklará den kaso atrako ku morto

115
WILLEMSTAD,— E kaso di atrako ku morto Janwe sigur tabata un kaso ku a hala atenshon i ku tabatin vários inkriminatorio.

Esaki sigur mirando kon mayoria di deklarashonnan ku tabatin, tabata kontra di esun di e sospechoso Shaheen File kende ta pendiente pa un sentensia. E sospechoso kende ta ninga tur e akusashonnan, a konta ku su abogado mr. Eisden durante tratamentu di e kaso.

Den e kaso aki a skucha un testigu anónimo i menasá bou di e kódigo A79 ku a deklará kontra di e sospechoso File. A skucha e testigu aki 2 biaha e aña aki pa añadí su deklarashon kontra di e sospechoso durante tratamentu di e kaso.

Fiskal a trese dilanti ku e testigu aki mester tabata anónimo mirando kiko el a deklará i tambe ken su nòmber el a benta den e kaso. El a bisa ku e testigu a trese ku e sospechosonan esta Poppen i File ta miembro di NLS i ku e por spera represaya. El a bisa ku ta pa e motibu aki e testigu a bisa di tin miedu di deklará.

Tabata despues ku A79 a wak e grabashon di e atrako aki ku el a inisiá ku un deklarashon basta amplio. E testigu mesora despues di a wak e grabashon a benta nòmber di File i Poppen i ku ta e ta 100% ku ta nan. El a bisa ku el a rekonosé File ku ta esun ku tin e blusa ros i ku tambe el a mira su manera di move i postin. E testigu a asta bisa ku e ta mira e forma di Shaheen riba e grabashon.

El a rekonosé Poppen den e kaso aki na su kara i tambe na su postin, unda el a bisa ku e konosé den bario di Koraal Specht. El a bisa ku e ta rekonosé ámbos sospechoso den e kaso aki mirando ku ta basta aña e konosé nan i mesora e por ripará ku ta nan. Mas aleu el a bisa ku na nan manera di move el a kapta mesora ku ta nan i ku ta tur hende konosé otro den e bario di Koraal Specht.

A79 a bisa polisnan ku el a mira e grabashon ei kaba i ku ya el a rekonosé ámbos sospechoso den e kaso aki. El a bisa ku bario di Koraal Specht ta manera un famia i ku tur hende konosé otro.  El a bisa ku vários persona mas a  rekonosé nan den e atrako aki i ku asta persona serka di e sospechosonan a bisa esei.  El a splika ku ademas di rekonosé nan e sa ku ta nan a tira e atrako aki. E testigu a bisa ku File a biaha pa Aruba algun dia despues di e atrako miéntras Poppen a biaha pa St Maarten i despues St Kitts & Nevis.

Mas aleu el a bisa ku ámbos ta ligá na NLS i ku ántes File tabata un gai hopi trankil. El a bisa ku despues ku File a bai traha na aeropuerto ku el a kuminsá pone droga riba avion pa NLS. Tambe el a bisa ku Poppen ta protehá pa ‘Venenu’ kende aktualmente tin bida largu.  Loke tambe tabata remarkabel ta e echo ku A79 a trese dilanti ku despues ku File a haña òrdu di ariba el a drenta NLS.

Segun  e testigu ku òrdu di ariba e kier men ku ta di ‘Nuto’ ku ‘Tyson’ el a haña òrdu, pa buta droga riba avion.