A denunsiá morto di 59 persona den man di gèngnan armá

234
Outoridatnan ya a kuminsá traha kontra di tipo di gèng nan aki.
PORT-AU-PRINCE – Un total di 59 persona a pèrdè nan bida dia 13 di novèmber den e zona di La Saline, na e kapital haitiano. Esaki segun loke a keda denunsiá den un informe, publiká pa e Defensa di Derechinan Humano di Haiti, kua ademas a kalifiká esaki komo un masakre di estado.

E organisashon, ku a identifiká un total di 45 persona ku a pèrdè nan bida, a atribuí e loke ku a sosodé na gèng nan arma ku ta operá ku un supuesto apoyo di miembronan di polis di e pais, kua ta pasando den un situashon di inseguridat hopi grave. Esaki ku morto den e último luna di agentenan polisial i sivilnan.

Entre e víktimanan tin 16 hende muhé i 6 menor di edat i a presisá ku 7 di e hende muhénan a keda violá i ku 150 bibienda tabata esenario pa aktonan di vandalismo.

Dia 15 di novèmber último, dos dia despues di e echonan, outoridatnan a denunsiá hayasgo di un total di mas ku dies kurpa sin bida tirá entre sushi riba kayanan di La Saline, serka di e sede di Parlamento.

E bosero polisial a indiká ku a detené mas di 80 persona durante operashonnan kontra gèng nan armá na e kapital di e pais.

E bosero a sigui indiká ku durante e operativo di djadumingu último a sa di haña munishon, armanan di kandela i tambe algun arma outomátiko ku ta suponé di ta pertenesé na e institushon polisial mes.

E operashonnan aki a keda indiká ku ta pa asina intentá di liberá zonanan for di gèng nan arma, i ku esaki ta simplemente e komienso. El a indiká ku nan ta satisfecho pero ku ainda tin hopi trabou mas di hasi.