Sharverley “Velli” Alexander a skohe pa Cache Royale

164
Esaki ta e kantante nobo di Cache Royale.

WILLEMSTAD,—-No ta na Kòrsou so tin moveshon nan ta tumando lugá. Di informashon ku nos a risibí direktamente for di Hulanda, ta bisa ku kos ta hopi kayente na tera friu tambe pa loke ta trata diferente negoshashon i moveshon nan ku ta tumando lugá.

Algun siman tras di lomba nos a skibi un artíkulo ku na Hulanda tin negoshashon ta tumando lugá entre e kantante Sharverley “Velli” Alexander ku gerente di agrupashon musikal Euphoriia,nos tabatin informashon ku tur kos tabata mustra ku “Velli” lo pasa forma parti di Euphoriia.

Pero nos a haña informashon ku un Piskadó ku tin fama internashonal a tera su liña na awa i pega e piska grandi, hala esaki trese na tera sin ningun klase di problema. Di informashon ku nos a haña direktamente for di Hulanda ta bisa ku e hóben kantante yu di Kòrsou Sharverley “Velli” Alexandera pasa forma parti di agrupashon musikal Cache Royale.

Tambe nos tin informashon ku “Velli” su debut ofisial den Cache Royale lo bai ta Pasku anochi, kaminda ku tambe lo bai tei Brian Dekkers i Qshans. T’asina ku nos a drenta den kontakto ku Richel Calister, i nos a bisé di e informashon ku nos tin rondó di e moveshon di e kantante “Velli”, Richel a konfirmá na nos ku esei ta bèrdat i ku “Velli” ta e kantante nobo pa agrupashon musikal Cache Royale i ,ku su debut lo bai ta Pasku Anochi.