Liga 50 no ta tuma mas ekipo

227
Ban Serio kampion di Liga 50 último añanan. Liga 50 tin 10 ekipo i ta hunga tur djasabra kuminsando 10’or di mainta na Cirilo Chirino Ballpark.
Willemstad,– Vigilante a buska i a haña konfirmashon ku e liga di sòfbòl Liga 50 no ta bai tuma mas ekipo. Nos a buska e informashon mirando ku aparentemente tin interes di sigur dos persona pa lanta un ekipo pa bai hunga den liga 50. Direktiva di e liga a bisa bon kla ku por lo pronto nan no ta bai tuma mas ekipo i ta wanta e kantidat na esnan ku tin aktualmente.

Na ta basa nan desishon riba e echo ku ta solamente djasabra ta hunga i ku tampoko tin mas tereno, pues si tuma mas ekipo tin ekiponan ku lo por keda dos siman sin mira akshon. Nan ta bisa ku e intenshon di e liga ta pa e hendenan di 50 òf mas por rekreá sano i pues no ta mira niun motibu pa amplia e liga, siendo ku ya kaba tin ekipo ku ta keda un siman sin mira akshon. Aktualmente Liga 50 ta konsistí di 10 tin di kual ta hunga kuater wega, pues 8 ekipo ta mira akshon, un ekipo tin warda di bar i un ekipo ta liber, pues e ta keda nèt bon. Un persona hopi yega na e liga a splika Vigilante ku ta tur aña tin interes di tim nobo pa drenta e liga, pero ku pa aworakí e úniko manera pa drenta e liga ta dor di djòin ku un ekipo ku ta den e liga kaba i hasta pa esaki tin algun regla di e liga ku mester tene kuenta kuné.