Archel Calister i Kenley Jansen ta bai sinta ku otro promé ku Pasku

320
Nan dos ta bai mesa ku otro pa bienestar di nos farándula lokal.
WILLEMSTAD,—-E informashon aki sin duda ta bai bira tópiko di kombersashon riba e dia di awe. Ayera a drenta un notisia na mesa di redakshon di ‘E Mulina’, a mes ora esaki a hala nos atenshon, paso ta trata aki di un informashon ku ta bal Oro den nos farándula.

T’asina ku nos a haña informashon ku gerente di agrupashon musikal ICONS BY GIO ku ta Kenley Jansen i gerente di agrupashon musikal GENTZ TRE’CHIC i Club Spoonz Archel Calister ta bai sinta ku otro, esaki ta nifiká ku si e dos persona nan aki a disidí di bai mesa ku otro, farándula di Kòrsou ta bai konos’é desaroyo nan hopi importante.

Esaki sin duda ta nifiká ku e kombinashon entre ICONS BY GIO i GENTZ TRE’CHIC lo bin mas lihé ku hopi hende ta pensa. No tin duda ku e kombinashon entre e organisashon musikal di Kenley Jansen i Archel Calister uni huntu, esaki por nifiká masha hopi pa nos farándula lokal.

Konosiendo e pensamentu di Archel Calister sigur e lo bai bin ku algun konsepto ku ta bai paralisá nos farándula lokal. ‘E Mulina’, tin informashon ku e sita entre e dos kabayero nan aki ta bai tuma lugá promé ku e siman di Pasku, esta promé ku 23 di desèmber.