Lusnan ta bai pega pa di 15 aña konsekutivo

155
E lus nan ta bai sende pa di 15 aña.

WILLEMSTAD,—-Ayera e organisashon di Nantje’s Crew tabatin nan rueda di prensa kaminda ku nan a trese un tiki di e historia kon tur kos a kuminsá 15 aña pasa. Lokual ku ta hasi e pesebre aki úniko i diferente ta ku e ta un bunita obra di papel i ta traha ku materialnan resiklá.

E atrakshon prinsipal di e bunita pesebre aki ta e animalnan bibu ku tur aña tin aden. E aña aki e sendementu di lus di e pesebre ta dediká na medionan di prensa den su totalidat,Coca-Cola,Kara production i kor Los Carmelitas.  Esakinan lo bai risibí nan rekonosementu serka e organisashon di Nantje’ Crew djasabra dia 8 di desèmber na kaya kane e hanchi pabou di toko Jomali na Montaña.

Lo bai tin un marcha protokolario ku tur e baluartenan kompaña pa un grupo di brasbènt i tambe lo bai tin animashon di Kor Los Carmelitas i grupo di Tambú Dal Pega. Kuminsando for di 8or di anochi. Bin unu bini tur pa asina nos por aploudí i sostené e hóbennan di Nantje’s Crew ku ta hasiendo un tremendo trabou den e aria di Montaña,banda riba i bisindario.

For di mañan te ku djadumingu 6 di yanüari komunidat kompletu ta keda kordialmente invitá pa por pasa atmirá e bunita obra di e hóbennan di organisashon di Nantje’s Crew. Pa kualke informashon por tene kontakto ku e organisashon di Nantje’s Crew na number di telefon:  +5999 681-8627 (Fabian Martina)/+5999 682-0240 (Jill Job) òf por manda nos un mail na akademiadiarte@hotmail.com.