Nòmber di Dibo-D tambe ta riba e famoso lista

273
Tin tur indikashon ku su nòmber ta riba lista di E.R.A.

WILLEMSTAD,—-E dia nan aki tin masha hopi moveshon mes den mundu di Festival di Tumba 2019. Nos por bisa libramente ku tur agrupashon musikal, ya a kuminsá harma nan tim pa bai partisipá kuné otro aña, den e di 49 edishon di Festival di Tumba di Kòrsou.

‘E Mulina’, a haña informashon ku agrupashon musikal E.R.A. ku otro aña ta selebrá e echo ku 30 aña pasa nan a sa di klasifiká nan promé Tumba, esaki tabata den bos di Rudsel Leito, ku un komposishon di Gibi Doran, ku e komposishon Tene.

Nos tin ku bisa ku E.R.A.  a kuminsá partisipá na aña 1985 i 1986 pero nan no a logra di klasifiká, e tempu ei tabata Boy Thode ku a bai na dos okashon i Gibi Emelina. Tabata na aña 1987 ku Gibi Doran a skibi un Tumba pa Rudsel Leito pa e bai partisipá kuné, mester bisa ku E.R.A. a klarifiká i tambe nan a sali na di tres finalista ku e komposishon “Tene”.

Na tur e banda a kompaña un total di 5 Rei di Tumba, ta trata aki di dft Harry Zimmerman na 1990, Tiko Balentien na tres okashon ku ta 2007, 2009 i na 2016, Ike Jesusron na 2014, Amos Balentin na 2012 i Hendrik De Windt na aña 2011. Pues na 7 okashon nan a sa di bai ku e Korona. Pa loke ta trata 2019 agrupashon musikal tin plan nan hopi serio, nos tin informashon ku nan tin un tim hopi fuerte ta bai kuné, riba nan lista tambe tin nòmber di e 4 biaha promé finalista Dibo-D ku ta na aña 2011, 2015, 2016 i na 2017. Nos a drenta den kontakto ku Dibo-D, i nos a bisé di e informashon ku nos tin, pero e kantante a bisa nos ku e no ta na altura di e informashon ku nos a konfront’é kuné, tambe nos a yama Bibi i Layo pero ningun di nan dos no a kontesta nan telefon. Pero manera ku nos sa bisa semper tempu ta e mihó maestro.